У доме №9 на вуліцы Леніна ў Мінску завяршылі вываз канструкцый, пашкоджаных пажарам, праінфармавалі ў Мінгарвыканкаме.
Як паведамілі на нарадзе, якую правёў мэр беларускай сталіцы Уладзімір Кухараў, да канца дня 3 ліпеня плануецца ўсталяваць часовую страху. На аб’екце задзейнічаныя 153 чалавекі.
Цяпер выкананы статычны разлік канструкцый кроквеннай сістэмы, падабраны і падлічаны асноўныя аб’ёмы матэрыялаў для закупкі, распрацоўваецца схема раскладкі крокваў і вузлы мацавання элементаў. Для ацэнкі ходу работ на пляцоўцы штодня праводзяць выязныя нарады.
Нагадаем, пажар у шасціпавярховым доме на вуліцы Леніна, 9 адбыўся ўвечары 28 чэрвеня. Каля 18:40 дырэктар адной з кампаній, размешчаных у офісным памяшканні будынка, адчуў пах гару і паведаміў пра гэта ў МНС. Агонь ахапіў плошчу больш за 1000 кв. м, цалкам патушыць пажар удалося толькі да 3 гадзін ночы ў панядзелак. Жыхароў дома часова рассялілі.
Следчы камітэт пачаў праверку па факце пажару.