Міністэрства замежных спраў Беларусі не атрымлівала прапановы Літвы аб кантактах на ўзроўні паслоў па асаблівых даручэннях. Пра гэта гаворыцца ў каментары прэс-сакратара беларускага знешнепалітычнага ведамства Руслана Варанкова адносна заяў у літоўскім друку.
“Хацелі б адзначыць эвалюцыю публічных заяў літоўскага боку, які перайшоў ад катэгарычнага адмаўлення любога палітычнага дыялогу да выказвання гатоўнасці да кантактаў на ўзроўні пасла па асаблівых даручэннях.
Пры гэтым мы канстатуем, што, нягледзячы на такую змену рыторыкі ў медыйнай прасторы, ніякай афіцыйнай прапановы або запыту на арганізацыю сустрэчы па дыпламатычных каналах ад Вільнюса не паступала. Падобны разрыў паміж публічнымі заявамі і адсутнасцю канкрэтных афіцыйных крокаў ускладняе ацэнку рэальнасці намераў літоўскага боку”, — заявіў Варанкоў.
Ён таксама выказаў гатоўнасць беларускага боку да кантактаў на дыпламатычным узроўні.
“Са свайго боку Беларусь паслядоўна і адказна падыходзіць да пытання дыялогу і чарговы раз пацвярджае сваю адкрытасць для кансультацый на адпаведным узроўні з мэтай абмеркавання ўсяго комплексу двухбаковых праблем, уключаючы памежныя.
Нагадаем, што для гэтага існуе трывалая прававая аснова: пункт 1.6 артыкула 31 Дагавора аб рэжыме беларуска-літоўскай дзяржаўнай мяжы непасрэдна прадпісвае бакам, якія не дасягнулі дамоўленасці паміж памежнымі ўпаўнаважанымі, урэгуляваць разыходжанні на дыпламатычным узроўні. Такім чынам, мы чакаем, што публічная гатоўнасць Літвы будзе, нарэшце, падмацавана канкрэтнай афіцыйнай прапановай. Пасля гэтага беларускі бок гатовы неадкладна прыступіць да прадметнай працы”, — дадаў ён.
