Прэс-служба МУС заявіла пра затрыманне “ўдзельнікаў і лідара групы прыхільнікаў анархічных поглядаў”, сярод якіх быў прыхільнік “ваеннага джыхаду”. Затрыманне прайшло пры падтрымцы спецназаўцаў з атрадаў “Рысь” і “Тарнада”.
“Чацвёра мінчан ва ўзросце ад 20 да 28 гадоў неаднаразова на тэрыторыі архітэктурна-скульптурнага комплексу “Мінск – горад-герой”, дзейнічаючы з выключным цынізмам, здзяйснялі знявагу з сімвалаў Перамогі і ахвяраў Вялікай Айчыннай вайны. Фігуранты нецэнзурна выказваліся ў адрас ветэранаў, плявалі на манумент, суправаджалі тое, што адбываецца, непрымальнымі каментарыямі. Тым самым адмаўляючы генацыд беларускага народа і подзвігі герояў”, – выклаў версію сілавікоў прадстаўнік ГУБАЗіК МУС Уладзімір Гарагляд.
Паводле яго слоў, затрыманыя здымалі ўсё на відэа, а ролікі размяшчалі ў сацсетках.
Ён таксама дадаў, што яны з’яўляюцца “анархістамі і актыўнымі ўдзельнікамі субкультурнай моладзевай групоўкі “антыфа”. Пры гэтым сярод іх быў “прыхільнік “ваеннага джыхаду”, а па месцах жыхарства затрыманых былі канфіскаваны халодная зброя, адзенне і прадметы з анархічнай і нацысцкай сімволікай, сігнальны пісталет, аргтэхніка.
Крымінальная справа ўзбуджана па артыкуле за злоснае хуліганства.
