Мінсельгасхарч чарговы раз перагледзеў мінімальныя экспартныя цэны на малочныя прадукты. Пастанова міністэрства №132 ад 10 снежня сёння апублікавана на Нацыянальным прававым інтэрнэт-партале. Яна ўступае ў сілу з 12 снежня.
Дакументам перагледжана цана на малако і вяршкі, згушчаныя або з дабаўленнем цукру ці іншых падсалоджвальных рэчываў, у парашку, гранулах або ў іншых цвёрдых відах, з утрыманнем тлушчу не больш за 1,5%. Яна паніжана на 0,2 долара да 2,9 долара за кілаграм пры пастаўках у краіны па-за межамі СНД і Грузіі. Цана на гэтыя прадукты для іншых рэгіёнаў не змянялася.
Таксама Мінсельгасхарч прыкметна панізіў цэны на сметанковае масла для ўсіх краін, акрамя Расіі. Цяпер сметанковае масла тлустасцю 80% і больш можна прадаваць у краіны ЕАЭС, СНД і Грузію не танней, чым па 4,9 долара за кілаграм. Цана паніжана адразу на 1,1 долара. Мінімальная цана на дадзены прадукт для астатніх дзяржаў паніжана на 0,8 долара да 4,5 долара за кілаграм.
Масла тлустасцю больш за 72%, але менш за 80% у краіны ЕАЭС, СНД і Грузію цяпер будзе прадавацца не танней за 4,3 долара за кілаграм (-1 долар), а ў астатнія — не танней за 3,9 долара за кілаграм (-0,8 долара).
Цэны на іншыя мясныя і малочныя прадукты, якія рэгулююцца МСГХ, не пераглядаліся.