Суд Мінскага раёна вынес прысуд вінаватаму ў аварыі, у якой загінула сям’я з Расіі. Яму прызначана пакаранне ў выглядзе пазбаўлення волі на максімальны тэрмін, прадугледжаны санкцыяй дадзенага артыкула — 10 гадоў калоніі агульнага рэжыму. Яго таксама на 8 гадоў пазбавілі права займацца дзейнасцю, звязанай з кіраваннем транспартнымі сродкамі.
Пра гэта ў эфіры тэлеканала АНТ распавяла дзяржабвінаваўца Генеральнай пракуратуры рэспублікі Таццяна Гракун.
Смяротная аварыя адбылася ў канцы чэрвеня гэтага года. П’яны кіроўца, кіруючы аўтамабілем Mercedes-Benz, на высокай хуткасці зачапіў спадарожнае таксі, якое адкінула на дарожную агароджу. Пасажыры — расіяне: пажылая жанчына, яе дачка і дзве ўнучкі — загінулі на месцы. Сям’я вярталася дадому і ехала ў аэрапорт.
Як вынікае з матэрыялаў справы, у судовым пасяджэнні ўстаноўлена, што напярэдадні трагедыі абвінавачаны распіваў спіртныя напоі са сваім прыяцелем. Выпітага аказалася мала, і ён накіраваўся ў краму на аўто. Па дарозе ён перадаваў стырно свайму таварышу, які ўвогуле не меў вадзіцельскага пасведчання. Пад раніцу маладзёны вырашылі паехаць у госці да знаёмай у Маскву, і кіроўца зняў нумары з машыны. Паводле слоў сведак, падчас паездкі ён пастаянна адцягваўся ад ваджэння і не заўважыў, як машына на высокай хуткасці набліжаецца да таксі. П’яны кіроўца не паспеў зрэагаваць.
“З улікам прадстаўленых бокам дзяржаўнага абвінавачання доказаў судом Мінскага раёна па справе пастаўлены прысуд. Бяручы да ўвагі грамадскую небяспеку здзейсненага злачынства, а таксама з улікам асобы абвінавачанага, яму, у адпаведнасці з часткай пятай артыкула 317 Крымінальнага кодэкса Рэспублікі Беларусь, прызначана пакаранне ў выглядзе пазбаўлення волі на максімальны тэрмін, прадугледжаны санкцыяй дадзенага артыкула — 10 гадоў, з адбываннем пакарання ў папраўчай калоніі ва ўмовах агульнага рэжыму, і пазбаўленне права займацца дзейнасцю, звязанай з кіраваннем транспартнымі сродкамі, на 48 гадоў”, — распавяла дзяржабвінаваўца.
Прысуд у законную сілу пакуль не ўступіў і можа быць абскарджаны.
