Аляксандр Лукашэнка, прыводзячы да прысягі суддзяў Вярхоўнага і Канстытуцыйнага судоў, не абышоў увагай падзеі ў Венесуэле. Ён прывёў у якасці прыкладу дзеянні Канстытуцыйнай палаты Вярхоўнага суда Венесуэлы.
“У нашым ціхім, спакойным грамадстве (дай бог, каб і далей так было), напэўна, не ўсе і не заўсёды разумеюць ролю, асабліва Канстытуцыйнага суда. Калі з Вярхоўным судом і агульнымі судамі ў нас людзі часта сутыкаюцца ў жыцці, патрабуючы справядлівасці (і гэта правільна), то з Канстытуцыйным — не заўсёды”, — сказаў Лукашэнка, перадае яго прэс-служба.
Ён адзначыў, што ў Венесуэле Канстытуцыйны суд ужо адыграў сваю ролю.
“І вось апошнія падзеі ў нашай сяброўскай Венесуэле — вось дзе Канстытуцыйны суд адыграў сваю ролю і прыняў жорсткія рашэнні”, — сказаў ён, маючы на ўвазе рашэнне аб перадачы паўнамоцтваў прэзідэнта Дэлсі Радрыгес пасля затрымання і вывазу з краіны Нікаласа Мадуры амерыканскімі сіламі.
“Вы бачыце, пра што я вас ужо даўно папярэджваў, тую турбулентнасць, якую мы назіраем у свеце. У гэтай сітуацыі трэба быць акуратнымі, спакойнымі, не спяшацца. І многае будзе залежаць ад вас — суддзяў. Старшынь нашых судоў, суддзяў Канстытуцыйнага суда. Вельмі многае будзе залежаць. Таму майце гэта на ўвазе, цаніце гэта і беражыце краіну.
Мы працуем на карысць нашага народа, не страцілі нашы традыцыі. Не страцілі тое, што дасталося нам ад нашых продкаў. Але жыццё вельмі разнастайнае, асабліва ў момант змены пакаленняў. Справа ў тым, як мы будзем выконваць волю нашага народа. А ён гэтага заслужыў. Будзьце вельмі пільнымі, акуратнымі і ўважлівымі.
Што да мяне, ад мяне дрэнных вестак для судоў не чакайце. У мяне былі непрыемныя мае дзіцячыя, можна сказаць, уражанні пра суддзяў і пра суд.
Я з гэтым сутыкнуўся, але памятаю да гэтага часу нават у дэталях. Я пакляўся сам сабе, што вось наколькі будуць мае магчымасці, здольнасці, я буду рабіць усё, каб у грамадстве было справядліва. Памятайце, я казаў, і вы як юрысты мяне зразумееце, што мы не можам прапісаць усё, Андрэй, нават у Канстытуцыі і не можам прапісаць усё ў законах. Але дух, фундамент, аснова ў нас адна — справядлівасць. Гэта вас перш за ўсё датычыцца. Будзьце справядлівыя да нашых людзей, да нашага народа. Шчасця вам, здароўя. Жывіце доўга і дзейнічайце на карысць сваёй краіны і нашага народа”, — папярэдзіў Лукашэнка суддзяў.
Нагадаем, у снежні рашэннем Усебеларускага народнага сходу Сяргей Сівец быў прызначаны на пасаду старшыні Канстытуцыйнага суда, а былы генпракурор Андрэй Швед — Вярхоўнага суда. Сёння яны, а таксама некалькі новых суддзяў, таксама прызначаных у ВС і КС, былі прыведзены да прысягі.
