Аляксандр Лукашэнка лічыць, што галоўным прыярытэтам у адносінах Мінска і Тэгерана павінна быць эканоміка. Пра гэта ён заявіў падчас сустрэчы з міністрам замежных спраў Ірана Аббасам Аракчы.
Вітаючы дыпламата, Лукашэнка падзякаваў яму за візіт на фоне напружанай міжнароднай абстаноўкі. Ён таксама назваў Іран адной з самых блізкіх і дружалюбных краін. Паводле слоў Лукашэнкі, бакі рэалізуюць план супрацоўніцтва на 2023–2026 гады, але ўжо можна планаваць і далейшае развіццё адносін.
“Думаю, вы пагодзіцеся з тым, што ў нас у прынцыпе няма ніякіх праблем у палітыка-дыпламатычных адносінах паміж дзвюма краінамі. Але, думаю, вы таксама пагодзіцеся, што асновай усяго з’яўляецца эканоміка, гандлёва-эканамічныя адносіны паміж Беларуссю і Іранам. У гэтым плане мы з вамі, мякка кажучы, можам зрабіць вельмі шмат”, — сказаў Лукашэнка, перадае яго прэс-служба.
Ён падкрэсліў, што галоўны прыярытэт у адносінах для яго — эканоміка.
“Для нас прыярытэт прыярытэтаў — гэта эканоміка. Таму я прапаную не толькі пагаварыць пра гандлёва-эканамічныя адносіны з такой вялізнай краінай, якой з’яўляецца Іран, дзе мы можам шмат зрабіць для Ірана, у нас ёсць пэўныя магчымасці і інтарэс, але таксама, магчыма, і вызначыць некаторыя напрамкі той дарожнай карты, таго плана, які будзе вызначаны на бліжэйшую перспектыву”, — сказаў ён.
На думку Лукашэнкі, беларускі бок выконвае ўсе дамоўленасці.
“Я не выявіў, каб мы, з боку Беларусі, не выканалі хоць адзін з пунктаў дамоўленасцей. Гэта наша прынцыповая пазіцыя, мы заўсёды яе прытрымліваемся ў дамоўленасцях з іншымі краінамі — свята выконваць тое, што мы паабяцалі”, — сказаў ён і папрасіў перадаць прывітанні вярхоўнаму лідару Ірана Алі Хаменэі і прэзідэнту Масуду Пезешкіяну.
У сваю чаргу Аракчы перадаў Лукашэнку прывітанне ад сваіх лідараў.
“Як вы слушна адзначылі, нашы адносіны цалкам дружалюбныя, няма ніякіх перашкод і праблем. Аснова нашага ўзаемадзеяння — гэта эканамічнае супрацоўніцтва, якое развіваецца штодзённа. Ваш візіт у Тэгеран і візіт прэзідэнта Ірана спадара Пезешкіяна ў Мінск былі сапраўды ключавымі вехамі ў развіцці двухбаковага ўзаемадзеяння”, — сказаў ён.
Міністр нагадаў, што нядаўна адбылося пасяджэнне міжурадавай камісіі, у межах якога адбыўся візіт у Тэгеран беларускага міністра прамысловасці. Аракчы назваў пасяджэнне паспяховым. Паводле яго слоў, іранскі бок задаволены дасягнутымі дамоўленасцямі.
“Мы вельмі задаволены. Дасягнуты прадметныя, добрыя дамоўленасці. Я сёння тут, каб больш глыбока прапрацаваць усе гэтыя пытанні”, — сказаў ён.
