Камітэт Сейма Літвы па нацыянальнай бяспецы і абароне падтрымлівае план дзеянняў Еўрапейскай камісіі па барацьбе з пагрозамі з боку дронаў, піша LRT. Старшыня камітэта Рымантас Сінкявічус назваў перамогай літоўскай дыпламатыі ўключэнне ў ініцыятыву метэазондаў з кантрабандай.
«Ёсць адзін радасны момант: (…) паветраныя шары ўключаны ў гэтую ініцыятыву. Верагодна, дзякуючы намаганням літоўскіх дыпламатаў, паколькі ні для адной іншай краіны гэтае пытанне не з’яўляецца настолькі актуальным. Прыемна, што літоўская праблематыка выходзіць на еўрапейскі ўзровень», — заявіў ён журналістам у сераду.
План прадугледжвае ўзмацненне рэгістрацыі дронаў, стварэнне беспалётных зон, паляпшэнне сістэм выяўлення на важных аб’ектах. Акрамя таго, плануецца штогод праводзіць агульнаеўрапейскія вучэнні па тэставанні сістэм супрацьдзеяння дронам.
Дакумент з’явіўся на фоне нарастаючых пагроз з боку дронаў і метэаралагічных паветраных шароў, з якімі ЕС сутыкаецца ў апошнія гады. Са снежня мінулага года ў Літве была ўведзена надзвычайная сітуацыя з-за паветраных шароў з кантрабандай, якія запускаюцца з Беларусі. Літоўскія палітыкі кваліфікуюць гэтыя запускі як гібрыдную атаку Мінска.
Пасля лютаўскай прэзентацыі Еўрапейская камісія прыступіла да абмеркавання прапанаваных мер з краінамі ЕС.
