Літоўская паліцыя мае намер абвясціць Антанаса Кандротаса, які з’ехаў у Беларусь і таксама вядомы як Цэлафанас, у міжнародны вышук.
У чацвер Апеляцыйны суд Літвы вынес канчатковы прысуд Кандротасу. Ён асуджаны на 3,5 года пазбаўлення волі па справе аб падатковых злачынствах, звязаных з незаконным гандлем палівам і ўхіленнем ад выплаты падаткаў. Суд скараціў першапачаткова прызначанае Кандротасу пакаранне.
“Пасля атрымання пастановы суда будуць вывучаны ўсе абставіны, і будзе ўстаноўлена, што ён знаходзіцца ў замежнай краіне, пасля чаго будзе абвешчаны міжнародны вышук. Інфармацыя пра міжнародны вышук будзе абвешчана па каналах Інтэрпола. Беларусь і Расія з’яўляюцца краінамі — удзельніцамі Інтэрпола”, — заявіў у пятніцу агенцтву Elta прадстаўнік Дэпартамента паліцыі Рамунас Матоніс.
Кандротас знаходзіцца ў Беларусі з пачатку мая. Ён неаднаразова выступаў у прапагандысцкіх перадачах.
