Міністэрства замежных спраў Літвы прапанавала пашырыць нацыянальныя санкцыі ў дачыненні да грамадзян Беларусі і Расіі, піша LRT са спасылкай на BNS.
Сярод новых мер называюцца абмежаванні на куплю нерухомасці каля стратэгічных аб’ектаў, а таксама забарона на ўезд асобам, якія падтрымліваюць расійскую агрэсію супраць Украіны. Адпаведныя папраўкі да закона аб нацыянальных абмежавальных мерах вынесеныя на ўзгадненне.
Ведамства прапануе забараніць уезд у Літву грамадзянам Беларусі і Расіі, а таксама прадстаўнікам арганізацый, якія маюць намер займацца ў краіне дзейнасцю ў сферах адукацыі, навукі, культуры, спорту, мастацтва і забаў, калі будзе ўстаноўлена, што яны падтрымліваюць вайну супраць Украіны, удзельнічалі ў мерапрыемствах на акупаваных Расіяй украінскіх тэрыторыях або садзейнічалі дзеянням, накіраваным супраць суверэнітэту і тэрытарыяльнай цэласнасці Украіны.
Акрамя таго, абмежаванні прапануецца распаўсюдзіць на асоб, якія падтрымліваюць парушэнні правоў чалавека або рэпрэсіі супраць грамадзянскай супольнасці і дэмакратычных сіл у Беларусі і Расіі альбо ўяўляюць пагрозу дэмакратыі і вяршэнству права. Таксама прапануецца адмовіць ва ўездзе тым, хто прадпрымае дзеянні або праводзіць палітыку, якая падрывае тэрытарыяльную цэласнасць, суверэнітэт і незалежнасць Украіны, падрывае стабільнасць або бяспеку Украіны.
«Нядаўнія абмеркаванні, у тым ліку на ўзроўні мясцовых органаў улады, паказалі неабходнасць больш дакладнага рэгулявання ўдзелу прадстаўнікоў Расіі, якая ажыццяўляе агрэсію супраць Украіны, і Беларусі, якая яе падтрымлівае, у грамадскай дзейнасці ў Літве ў сферах адукацыі, навукі і адукацыі, культуры, спорту, мастацтва і забаў», – гаворыцца ў каментары міністэрства.
«Важна забяспечыць інстытуцыі выразнай прававой асновай для прыняцця своечасовых, паслядоўных і абгрунтаваных рашэнняў, каб грамадская дзейнасць у сферы культуры і забаў не выкарыстоўвалася для прапаганды, скажэння гісторыі і фарміравання наратываў з мэтай уплыву на літоўскае грамадства, эксплуатацыі гэтых сфер у якасці палітычнага інструмента», — гаворыцца ў дакуменце.
Згодна з ініцыятывай МЗС, грамадзяне Беларусі і Расіі, якія жадаюць прыехаць у Літву для працы ў сферах адукацыі, культуры, спорту, мастацтва або забаў, павінны будуць падпісаць публічную дэкларацыю з асуджэннем расійскай агрэсіі супраць Украіны, падтрымкай Статута ААН, а таксама незалежнасці, суверэнітэту і тэрытарыяльнай цэласнасці Украіны ў міжнародна прызнаных межах. Адмова ад падпісання дакумента стане падставай для адмовы ва ўездзе.
Пры гэтым грамадзяне Беларусі і Расіі, у дачыненні да якіх не выяўлена названых абставін, змогуць удзельнічаць у мерапрыемствах у Літве, калі не будуць прадстаўляць дзяржаву свайго грамадзянства і выступяць у нейтральным статусе.
Таксама МЗС Літвы прапануе абмежаваць набыццё нерухомасці грамадзянамі Беларусі паблізу аб’ектаў, якія маюць стратэгічнае значэнне для нацыянальнай бяспекі, і ваенных палігонаў. Грамадзянам Беларусі, якія маюць від на жыхарства ў Літве, плануецца забараніць купляць такую нерухомасць, а грамадзяне Беларусі без віду на жыхарства і юрыдычныя асобы, якія ім належаць, не змогуць набываць яе ўвогуле. Для грамадзян Расіі аналагічныя абмежаванні на куплю нерухомасці ўжо дзейнічаюць.
Міністэрства замежных спраў прапануе ўвесці такія папраўкі ў дзеянне з 1 студзеня наступнага года.
Прапануецца, каб новыя меры набылі моц з 1 студзеня 2027 года.
Закон аб нацыянальных абмежавальных мерах дзейнічае ў Літве з 2023 года. Раней улады краіны ўжо прымалі асобныя рашэнні аб забароне на ўезд некаторым расійскім выканаўцам, якія падтрымліваюць палітыку Крамля або выступалі ў анексаваным Крыме.
