Старшыня праўлення Нацбанка Беларусі Раман Галоўчанка адзначае дэзінфляцыйныя працэсы ў краіне. Рост цэн застаецца ніжэй за мэтавы параметр, які на гэты год складае 7%.
«Цяпер траекторыя інфляцыі ідзе нават ніжэй за нашу мэту. Мы бачым мноства дэзінфляцыйных фактараў, якія ўздзейнічаюць. Але, вядома ж, элемент неспакою, ён заўсёды крыху блытае прагнозы. Але пакуль мы сябе адчуваем, як я ўжо сказаў, дастаткова спакойна, і базавая інфляцыя, і агульная інфляцыя, і, самае галоўнае, інфляцыйныя чаканні насельніцтва – гэта такі маркер, які сведчыць пра ўстойлівасць дэзінфляцыйных працэсаў – пакуль нас радуюць.
Таму, бачачы гэта, мы рухаемся ў тым ліку ўніз і па нашай стаўцы. Я маю на ўвазе цяпер не стаўку рэфінансавання Нацыянальнага банка, а ў цэлым банкі, бачачы рынкавую сітуацыю, зніжаюць кошт крэдытных рэсурсаў, і гэта таксама адпавядае нашым мэтам», – сказаў ён.
Нагадаем, гадавая інфляцыя па выніках чэрвеня знізілася да 4,3%. Базавая інфляцыя, якая выключае змяненне цэн на сезонныя і рэгуляваныя тавары і паслугі, у чэрвені склала 0,4%, або на 0,1 п.п. менш, чым у маі, а з пачатку года яна дасягнула 2,3%.
Галоўчанка таксама адзначыў, што ў краіне дастаткова грошай для рэалізацыі інвестпраектаў.
«Вядома ж, ёсць. Крыніцы разнастайныя: у банкаўскай сістэме істотны прафіцыт ліквіднасці, у тым ліку і на інвестыцыйныя мэты, нягледзячы на тое, што мы да свайго ж плана ўжо ў два разы за паўгоддзе нарасцілі інвестыцыйнае крэдытаванне. Рэзервы ёсць і ў Нацыянальным банку, і ў банкаўскай сістэме, і ў бюджэце. Пытанне толькі ў правільных напрамках іх выкарыстання», – сказаў ён беларускаму тэлебачанню.
