Прэс-служба ўрада Беларусі апублікавала кароткае відэа з каментарамі прадстаўнікоў дэлегацыі польскіх і літоўскіх перавозчыкаў, якія сёння сустрэліся з прэм’ер-міністрам Аляксандрам Турчыным. Ён запэўніў, што беларускі бок не імкнецца канфіскоўваць грузавікі з літоўскай рэгістрацыяй, якія з восені застаюцца ў Беларусі.
“Хацелі б мы спачатку падзякаваць за магчымасць прыехаць сюды, за той час, які нам прысвяцілі.
Мы поўныя надзеі, што ўсе нашы праблемы будуць вырашаны пазітыўна, што нашы транспартныя сродкі змогуць вярнуцца ў Польшчу, і далей мы будзем ажыццяўляць узаемныя перавозкі як мага лепшым чынам, бо мы з’яўляемся суседзямі і нашы адносіны павінны быць пазітыўнымі. З такімі надзеямі мы прыехалі ў Беларусь.
Спадар прэм’ер стварыў вельмі прыязную атмасферу для размовы. Дазволіў нам выказацца, сказаць, якія ў нас праблемы. Прыслухаўся да гэтага, спадзяёмся, што з разуменнем. Спадзяёмся на завяршэнне… Мы не з’яўляемся палітыкамі, мы гаспадары ва ўласных фірмах і гаспадарчага рашэння чакаем. Таму таксама звярнуліся да гаспадарнікаў”, — сказаў прадстаўнік дэлегацыі.
Літоўскія перавозчыкі паведамілі, што напісалі ліст Аляксандру Лукашэнку, пад ім падпісаліся 72 кампаніі.
“Мы рады, што нас прынялі выслухаць, што запрасілі нас выслухаць і выслухалі. Спадзяёмся на найлепшы вынік для ўсіх бакоў”, — сказаў адзін з удзельнікаў дэлегацыі.
