У МУС расказалі падрабязнасці ўчарашняга смяротнага ДТЗ на вуліцы Маскоўскай у Брэсце, у выніку якога загінулі тры чалавекі.
Паводле даных ведамства, кіроўца матацыкла Honda і кіроўца аўтамабіля Audi зладзілі хуткасны заезд на ажыўленай вуліцы. У выніку грубага парушэння правілаў дарожнага руху і перавышэння хуткасці загінулі кіроўца мапеда Viper, матацыкліст і яго 32-гадовая пасажырка. Ад удару цела жанчыны разарвала на часткі.
Нагадаем, трагедыя адбылася ўвечары 31 ліпеня. Каля 22:30 40-гадовы кіроўца матацыкла Honda пры руху ў напрамку выезду з горада сутыкнуўся са спадарожным мапедам Viper пад кіраваннем 45-гадовага жыхара Брэсцкага раёна. У выніку сутыкнення абодва кіроўцы і пасажырка матацыкла загінулі на месцы.
У МУС таксама паведамілі пра іншую аварыю з удзелам матацыкла ў горадзе Бяроза. Раніцай 1 жніўня матацыкліст не справіўся з кіраваннем, з’ехаў у кювет і перакуліўся. Мужчына загінуў, яго жонка была шпіталізаваная ў цяжкім стане.
У сувязі з ускладненнем дарожнай абстаноўкі на Брэстчыне па ўказанні міністра ўнутраных спраў Івана Кубракова ў рэгіён накіраваныя дадатковыя экіпажы ДАІ, уключаючы мотапатрулі з Гомельскай і Гродзенскай абласцей. Таксама ўзмоцненыя нарады спецпадраздзялення ДПС «Страла» МУС.
Паводле даных ведамства, за апошнія два дні на Брэстчыне адбылося 6 ДТЗ, у якіх 5 чалавек загінулі і яшчэ 5 атрымалі траўмы.
Інспектары ДАІ ўзмацнілі кантроль за выкананнем правілаў дарожнага руху, у першую чаргу за матацыклістамі. Асаблівая ўвага надаецца перавышэнню хуткасці і небяспечным паводзінам на дарогах у вячэрні і начны час.
