Літоўская паліцыя бярэ на сябе ахову Святланы Ціханоўскай. Гэта адбудзецца ў бліжэйшыя дні. Пра гэта BNS паведаміў прэс-сакратар Дэпартамента паліцыі Рамунас Матоніс.
«Магу пацвердзіць, што паліцыя бярэ на сябе ахову Ціханоўскай», — цытуе яго агенцтва.
Паводле яго слоў, гэта адбудзецца «ў бліжэйшыя дні». Матоніс дадаў, што інфармацыя пра рэжым аховы Ціханоўскай не будзе абнародаваная.
Да гэтага часу аховай Ціханоўскай займаецца служба бяспекі кіраўніцтва дзяржавы. Аб намеры панізіць узровень аховы Ціханоўскай стала вядома восенню. Тады рашэнне было абгрунтаванае змяншэннем пагроз для яе і тэхнічнымі прычынамі.
На фоне паніжэння ўзроўню аховы быў скарэктаваны рэжым працы фізічнага Офіса Ціханоўскай. Таксама СМІ паведамлялі пра пераезд офіса ў Польшчу. Тыдзень таму галоўны дарадца Ціханоўскай Франак Вячорка, каментуючы з’яўленне публікацый пра пераезд, заявіў, што офіс працуе ў звычайным рэжыме, ахова лідаркі дэмсіл была адноўленая і з таго часу застаецца ў сіле, а новая сістэма так і не была ўведзеная.
«Пакуль рана казаць пра якія-небудзь змены або пераезд. Разумею, што шмат спекуляцый. Але не варта драматызаваць», — казаў ён тады.
