Кіраўнік адміністрацыі Лукашэнкі Дзмітрый Крутой падчас візіту ў Кітай сустрэўся з членам пастаяннага камітэта Палітбюро ЦК Кампартыі КНР, сакратаром Цэнтральнай камісіі па праверцы дысцыпліны КПК Лі Сі.
“Падчас сустрэчы бакі пацвердзілі высокі ўзровень беларуска-кітайскіх адносін, якія адпавядаюць духу ўсепагоднага і ўсебаковага стратэгічнага партнёрства, абмеркавалі актуальныя пытанні міжнароднага і двухбаковага парадку дня.
Асаблівая ўвага была нададзена пытанням міжрэгіянальнага супрацоўніцтва, устойлівага эканамічнага развіцця, рэалізацыі сумесных праектаў. Бакі выказалі гатоўнасць да нарошчвання супрацоўніцтва ва ўсіх без выключэння галінах, а таксама падтрымання цесных кантактаў для рэалізацыі дасягнутых пагадненняў”, — паведамілі ў пасольстве Беларусі ў Кітаі.
Трэба адзначыць, што гэта не першая сустрэча Крутога і Лі Сі. У верасні мінулага года Лі Сі наведваў Беларусь і сустракаўся з Аляксандрам Лукашэнкам. Візіт праходзіў на фоне закрыцця Польшчай мяжы з Беларуссю. Тады ж Крутой і Лі Сі абмяркоўвалі досвед кітайскай сістэмы “1, 2, 3, 4, 5″ у працы са зваротамі грамадзян.
