Мінабароны абвясціла пра пачатак комплекснага вучэння з войскамі Заходняга аператыўнага камандавання. Ім кіруе першы намеснік міністра абароны – начальнік Генштаба Павел Муравейка. Вучэнне праходзіць з 19 па 25 сакавіка ў межах комплекснай праверкі баявой гатоўнасці.
“Вучэнне — гэта адна з галоўных фаз комплекснай праверкі, яно носіць выключна абарончы характар. У аснову яго задумы была пакладзена самая сучасная ваенна-палітычная абстаноўка, а таксама дасягненні ваеннага мастацтва ў галіне развіцця сродкаў узброенай барацьбы і тэндэнцый вядзення сучасных баявых дзеянняў у межах сучасных ваенных канфліктаў”, – сказаў Муравейка.
Вучэнне праводзіцца на палігонах і ўчастках мясцовасці ў Брэсцкай і Мінскай абласцях, якія “максімальна набліжаны да ландшафту” краіны. Пры гэтым ён падкрэсліў, што месцы правядзення вучэння знаходзяцца “на значнай адлегласці ад дзяржаўнай мяжы”, таму любыя заявы пра падрыхтоўку да нападу на якую-небудзь краіну, якія могуць прагучаць ад суседзяў, з’яўляюцца інсінуацыямі.
Вайскоўцы будуць адпрацоўваць падрыхтоўку абаронных рубяжоў і пазіцый з апорай на вузлы супраціву, участкі загарод. Пры гэтым прадугледжваецца максімальна выкарыстоўваць мясцовую прамысловую і адміністрацыйна-гаспадарчую базу.
“Прадугледжана адпрацаваць самыя сучасныя прыёмы прымянення войскаў і сродкаў паражэння: беспілотныя лятальныя апараты, комплексы радыёэлектроннай барацьбы і інфармацыйнага супрацьборства, вядзенне контрбатарэйнай барацьбы, стральбу на вялікія адлегласці. Не выключана, што ў межах актыўнага этапу вучэння будуць адпрацаваны актыўныя дзеянні механізаваных і танкавых падраздзяленняў па барацьбе з незаконнымі ўзброенымі фарміраваннямі, дыверсійна-разведвальнымі групамі праціўніка, а таксама адбіццё магчымых атак і актыўны манеўр”, – дадаў начальнік Генштаба.
Вынікі і выніковыя паказчыкі вучэнняў будуць пакладзены ў аснову далейшай падрыхтоўкі УС. Муравейка расказаў, што падраздзяленні, задзейнічаныя ў вучэнні, ужо занялі адведзеныя пазіцыі, абсталявалі іх і рыхтуюцца да адбіцця атак.
“Праверкі баявой і мабілізацыйнай гатоўнасці Узброеных Сіл сталі ў нашай арміі ўжо традыцыйнымі. Мы рэгулярна іх праводзім на пастаяннай аснове, гэта не з’яўляецца якой-небудзь надзвычайшчынай і не накіравана супраць якой-небудзь з суседніх з намі краін.
Нягледзячы на тое, што мы актыўна занятыя зараз падрыхтоўкай і правядзеннем вучэння і раптоўнай праверкі, мы ўважліва сочым за працэсамі ваеннай актыўнасці, якая адбываецца каля нашых межаў. Гэта і манеўры груповак войскаў, і комплекс мерапрыемстваў аператыўнай і баявой падрыхтоўкі, якія праходзяць у Польшчы і ў краінах Балтыі. Мы маем пэўную, павышаную пільнасць і не дапусцім ніякіх правакацый супраць нашай краіны, адкуль бы яны ні зыходзілі”, – сказаў Муравейка.
