Кіраўнік Службы дзяржаўнай бяспекі Латвіі Нормундс Межвіетс расказаў у інтэрв’ю брытанскай газеце The Telegraph, што ў Беларусі мігрантаў навучаюць у спецыяльных лагерах перад тым, як адправіць на мяжу.
«Я памятаю першыя гады, яны былі даволі спакойнымі… але ў апошні год сітуацыя стала больш агрэсіўнай», — цытуе яго газета.
Паводле слоў Межвіетса, перад тым, як адправіць мігрантаў праз мяжу, ім дэманструюць відэа са сведчаннямі людзей, якія нібыта пацярпелі ад жорсткасці латвійскіх пагранічнікаў. Кіраўнік СДБ назваў такія ролікі фальшывымі. Ён расказаў, што відэа вывучалі аналітыкі і прыйшлі да высновы, што раны, дэманстраваныя ў іх, не з’яўляюцца сапраўднымі.
«Яны паказваюць свае шнары, і, не будучы вялікім экспертам у гэтай галіне, магу сказаць, што гэта не сапраўдныя шнары», — сказаў ён.
«Гэта быў проста дрэнны, даволі просты макіяж», — дадаў ён у адказ на ўдакладняльнае пытанне.
The Telegraph прыводзіць яшчэ адну цытату кіраўніка СДБ, адзначаючы, што латвійскім пагранічнікам пагражае вялікая небяспека.
«У нас ёсць інфармацыя, што іх навучаюць [больш жорсткім метадам]», — сказаў Межвіетс.
Пры гэтым, як гаворыцца ў матэрыяле, кіраўнік службы “не гарэў жаданнем раскрываць дакладныя звесткі пра тое, што выявілі яго агенты разведкі”. Ён заявіў, што ў Беларусі на мяжы створана інфраструктура, якая ўключае “склады і гасцініцы”, а таксама “лагеры для навучання мігрантаў баявым навыкам перад тым, як выціснуць іх у Латвію”.
Паводле слоў Межвіетса, на латвійскай мяжы пакуль не выкарыстоўваюцца тунэлі, як гэта адбылося ў Польшчы.
«Мы пакуль не бачым тунэляў, як нашы польскія сябры… але з самага пачатку мы назіраем маштабнае нарошчванне сіл беларускіх уладаў, беларускага КДБ і пагранічнікаў, якія адкрыта заахвочваюць гэтую нелегальную міграцыю», — сказаў ён.
Варта адзначыць, што ў апошнія дні з паляпшэннем надвор’я мігранты сапраўды актывізаваліся на межах Беларусі і Еўрасаюза. Найбольшая колькасць спроб парушэння рэгіструецца менавіта латвійскімі пагранічнікамі. Так, па выніках нядзелі яны паведамілі, што спынілі 15 спроб парушэння мяжы, у панядзелак іх было 45, а ў аўторак — 22. Пры гэтым міграцыйны ціск на рубяжах Польшчы і Літвы значна ніжэйшы, а ў асобныя дні і зусім адсутнічаў.
