У студзені экспарт інвестыцыйных і прамежкавых тавараў з Беларусі вырас у параўнанні з аналагічным месяцам 2025 года. На працягу ўсяго мінулага года адзначалася негатыўная дынаміка па гэтых пазіцыях.
Паводле даных Белстата, экспарт інвестыцыйных тавараў у студзені вырас на 1,5% да 292,7 млн долараў, а прамежкавых тавараў — на 10,3% да 1,566 млрд долараў.
Імпарт інвестыцыйных тавараў пры гэтым знізіўся ў студзені на 7,3% да 351,6 млн долараў, а ўвоз прамежкавых тавараў — на 2,2% да 1,82 млрд долараў.
У гандлі спажывецкімі таварамі адзначаўся рост і экспарту, і імпарту.
Экспарт спажывецкіх тавараў вырас на 39,7% да 1,22 млрд долараў, у тым ліку харчовых — на 31,3% да 679,4 млн долараў, а нехарчовых — на 52,2% да 544,5 млн долараў.
Імпарт спажывецкіх тавараў павялічыўся на 25% да 1,2 млрд долараў, у тым ліку ўвоз харчовых тавараў — на 31,7% да 301,8 млн долараў, а нехарчовых — на 22,9% да 897,1 млн долараў.