Еўрапейскі саюз гатовы ўнесці свой уклад ва ўстойлівы мір на Блізкім Усходзе. Пра гэта заявіў старшыня Еўрапейскага савета Антоніу Кошта, каментуючы заявы пра дасягненне пагаднення паміж ЗША і Іранам. Падпісанне мемарандума чакаецца ў пятніцу.
“Я вітаю толькі што абвешчанае пагадненне паміж Вашынгтонам і Тэгеранам. Я спадзяюся на спыненне гэтай дарагой вайны і на поўнае аднаўленне свабоды суднаходства ў Армузскім праліве.
Я высока ацэньваю нястомныя дыпламатычныя намаганні ўсіх, хто зрабіў гэтую здзелку магчымай.
Зброя павінна замаўчаць, а нявырашаныя рознагалоссі павінны быць урэгуляваныя мірнымі сродкамі ў адпаведнасці з міжнародным правам. Еўрапейскі саюз гатовы ўнесці свой уклад у прасоўванне ўсёабдымнай стратэгіі ўстойлівага міру на Блізкім Усходзе”, — напісаў ў X Кошта.
Вярхоўная прадстаўніца ЕС па замежных справах і палітыцы бяспекі Кая Калас дадала, што міністры замежных спраў краін Саюза абмяркуюць на сённяшняй сустрэчы ўдзел у наступным этапе ўрэгулявання.
“Гэта патэнцыйны прарыў. Ён можа даць гэтак неабходную прастору для больш глыбокіх перамоў па іранскай ядзернай праграме і іншых найважнейшых пытаннях. Пасля рэалізацыі пагадненне павінна таксама змякчыць глабальны энергетычны крызіс.
У апошнія дні я размаўляла са сваімі іранскімі калегамі і калегамі з краін Персідскага заліва, а сёння міністры замежных спраў ЕС абмяркуюць, як ЕС можа актыўна ўдзельнічаць у наступным этапе.
Ад эканамічных рычагоў да ядзернай экспертызы і даўніх адносін з партнёрамі з краін Персідскага заліва, ЕС гатовы ўнесці свой уклад ва ўстойлівае ўрэгуляванне”, — заявіла яна.
