Еўрапейскі парламент прыняў закон, які прадугледжвае паэтапную адмову ад імпарту расійскага газу і павінен абараніць энергетычную бяспеку ЕС ад выкарыстання рэсурсаў як інструмента палітычнага ціску з боку Расійскай Федэрацыі. Дакумент падтрымалі 500 дэпутатаў, 120 выступілі супраць, 32 устрымаліся.
Згодна з новым законам, пастаўкі расійскага звадкаванага прыроднага газу на спотавым рынку будуць забароненыя адразу пасля ўступлення рэгламенту ў сілу — гэта чакаецца ў пачатку 2026 года. Імпарт трубаправоднага газу будзе спыняцца паступова і павінен цалкам завяршыцца не пазней за 30 верасня 2027 года. Падчас перамоў дэпутаты і прадстаўнікі дзяржаў ЕС дамовіліся паскорыць тэрміны адмены большасці дзеючых кантрактаў у параўнанні з першапачатковымі планамі. Таксама ўводзяцца штрафы, якія дзяржавы-члены абавязаны прымяняць да кампаній у выпадку парушэння новых правілаў.
Падчас перамоў з дацкім старшынством у Радзе дэпутаты Еўрапарламента настойвалі на забароне ўсяго імпарту расійскай нафты і дамагліся ад Еўрапейскай камісіі абавязацельства прадставіць адпаведны законапраект у пачатку 2026 года, каб эфектыўная забарона ўступіла ў сілу як мага хутчэй, але не пазней за канец 2027 года.
Дэпутаты таксама настойвалі на ўмацаванні ўмоў, пры якіх можа быць часова прыпыненая забарона на імпарт у надзвычайных сітуацыях, звязаных з энергетычнай бяспекай ЕС.
Каб закрыць магчымыя шчыліны і знізіць рызыку абыходу правілаў, кампаніі-аператары будуць абавязаны прадастаўляць мытным органам больш падрабязныя і строгія доказы краіны паходжання газу перад яго імпартам або закачкай у сховішчы.
