Еўрапарламент прагаласаваў за ўзмацненне правілаў прадастаўлення прытулку. У аўторак былі прыняты папраўкі да адпаведнага рэгламенту ЕС.
Еўрадэпутаты ўхвалілі стварэнне спісу бяспечных краін паходжання 408 галасамі «за», 184 «супраць» і 60, хто ўстрымаўся. Таксама яны прынялі пагадненне па рэгламенце аб прымяненні канцэпцыі бяспечнай трэцяй краіны: 396 галасамі «за», 226 «супраць» і 30, хто ўстрымаўся.
Пасля зацвярджэння паправак Еўрасаветам у ЕС з’явіцца новы агульны спіс бяспечных краін паходжання. У яго ўнесены Бангладэш, Калумбія, Егіпет, Косава, Індыя, Марока і Туніс. Згодна з новымі правіламі, кожны заяўнік павінен будзе даказаць, што дадзенае палажэнне не павінна прымяняцца ў яго выпадку з-за абгрунтаваных асцярог пераследу або рызыкі сур’ёзнай шкоды ў выпадку вяртання ў сваю краіну. Краіны-кандыдаты на ўступленне ў ЕС таксама будуць лічыцца бяспечнымі краінамі паходжання, калі няма абставінаў, якія ўказваюць на адваротнае, напрыклад, ваенны канфлікт, санкцыі.
Еўракамісія будзе адсочваць сітуацыю ў краінах, уключаных у спіс, і ў краінах-кандыдатах і рэагаваць у выпадку змянення абставінаў. Яна можа часова прызнаць краіну небяспечнай або прапанаваць яе канчатковае выключэнне са спісу.
Дзяржавы-члены змогуць вызначаць дадатковыя бяспечныя краіны паходжання на нацыянальным узроўні.
Таксама будзе прымяняцца прынцып бяспечнай трэцяй краіны, напрыклад, калі заяўнік праехаў транзітам праз трэцюю краіну па шляху ў ЕС і мог бы запытаць там эфектыўную абарону, альбо існуе пагадненне або дамоўленасць з трэцяй краінай на двухбаковым, шматбаковым або ўзроўні ЕС аб прыёме асоб, якія шукаюць прытулку. Такім заяўнікам можа быць адмоўлена ў прадастаўленні прытулку.
Папраўкі таксама дазволяць краінам ЕС дэпартаваць бежанцаў у цэнтры прадастаўлення прытулку ў краінах, да якіх яны не маюць ніякага дачынення.
Дадзеныя правілы з’яўляюцца часткай пакета мер ЕС у сферы міграцыі і прадастаўлення прытулку, які павінен уступіць у сілу ў чэрвені 2026 года. Некаторыя палажэнні могуць быць ужыты і раней.
