Архітэктурная студыя ZROBIM architects атрымала міжнародную прэмію IIDA Global Excellence Awards у катэгорыі «Адукацыя» за дызайн-праект школы ў Новай Баравой.
Праект быў створаны сумесна з забудоўшчыкам А-100, дзе студыя адказвала за дызайн.
Канцэпцыя школы будавалася на двух вобразах: «школа будучыні» — прастора для даследавання і росту, і «авіяцыйная» — назва вуліцы і блізкасць аэрадрома задалі візуальную мову інтэр’ераў з авіяцыйнымі і касмічнымі матывамі.
Асаблівую ўвагу надалі колерам і графіцы, як дэкаратыўнай, так і інфармацыйнай: стварылі падзел старэйшай і малодшай школы, прадумалі навігацыйныя маршруты і зрабілі так, каб дзецям было цікава знаходзіцца ў школе, пастаянна шукаць новае і атрымліваць новыя веды.
Пры распрацоўцы каляровай схемы прыдумалі сістэму, у якой за аснову ўзялі 4 простыя колеры і размеркавалі іх па паверхах. Гэта быў базавы прынцып, які далей быў дапрацаваны, праз змешванне колераў у розных зонах паверхаў, і ў спалучэнні з графікай такая схема стала менш відавочнай і больш гарманічнай.
Напрыклад, памяшканні малодшай школы нагадваюць аб дзіцячым садку і спрыяюць мяккай адаптацыі: нішы-домікі, роспісы на сценах, разнастайныя фактуры ствараюць нязмушаную атмасферу. У старэйшай школе асноўныя рашэнні захоўваюцца, але з сыходам у вялікую абстракцыю: на сценах ужо не пінгвін, які марыў лётаць, а кампазіцыі з каляровых плям і ліній.
У школе спраектавана 13 зон адпачынку, якія ўлічваюць адрозненні паміж вучнямі, напрыклад, іх узрост або паводзіны. На кожным паверсе размешчаны навуковыя экспанаты, якія ў гульнявой форме дэманструюць законы фізікі – ад «правіла рычага» да пашырэння гукавой хвалі і аптычных ілюзій. Для таго, каб вучні маглі адпачыць, стварылі спецыяльныя куткі цішыні.
Дызайнеры студыі распрацавалі практычна ўсю мэблю, пачынаючы ад пуфікаў у рэкрэацыйных зонах, заканчваючы абедзеннымі сталамі і крэсламі для розных узроставых катэгорый.
У выніку ўдалося зрабіць функцыянальную і эстэтычную прастору, якая наўпрост з уваходу натхняе вучняў і дорыць станоўчыя эмоцыі.
Прэмія IIDA Global Excellence Awards ацэньвае найлепшыя дызайнерскія праекты з усяго свету за ідэі, функцыянальнасць і якасць рашэнняў.
Падпісвайцеся на культурныя навіны Reform.news у Telegram
