Цырымонія ўскладання кветак і вянкоў да Кургана Славы прайшла без Аляксандра Лукашэнкі, які толькі ўначы вярнуўся з камандзіроўкі. Між тым год таму ён асабіста ўдзельнічаў у ёй разам з сынамі.
Да Кургана Славы быў ускладзены вянок ад яго імя. Кветкі ўсклалі найвышэйшыя службовыя асобы Беларусі. Са зваротам да прысутных выступіў дзяржаўны сакратар Савета бяспекі Аляксандр Вальфовіч. Варта адзначыць, што ўчора на ўрачыстым сходзе, прысвечаным Дню Незалежнасці, з прамовай выступаў прэм’ер-міністр Аляксандр Турчын.
«Перш за ўсё дазвольце выканаць даручэнне прэзідэнта Рэспублікі Беларусь Аляксандра Рыгоравіча Лукашэнкі, які сёння вырашае задачы стратэгічнага характару ў імя росквіту нашай краіны, павіншаваць усіх прысутных і ўвесь беларускі народ з Днём Незалежнасці Рэспублікі Беларусь», — сказаў Вальфовіч.
Ён назваў Курган Славы сімвалам вызвалення ад фашызму. Ён нагадаў асноўныя этапы Вялікай Айчыннай вайны на тэрыторыі краіны.
«Гаворачы пра мінулае і сучаснасць, мы непазбежна думаем пра будучыню. А будучыня Беларусі — гэта наша моладзь. Тая моладзь, якую я бачу сёння каля Кургана Славы, нясе эстафету памяці, якую нам перадалі дзяды і прадзеды», — працягнуў ён.
Дзяржаўны сакратар Савета бяспекі згадаў удзельнікаў «Цягніка памяці», больш за 100 тыс. маладых беларусаў, якія ўдзельнічаюць у патрыятычных, валанцёрскіх і грамадзянскіх праектах.
Вальфовіч падкрэсліў, што сёння Беларусь — гэта краіна, якая актыўна ўдзельнічае ў міжнародным парадку дня. Яе пазіцыя гучыць на пляцоўках ШАС і СНД, у дыялогу з партнёрамі ў Азіі, Афрыцы і Лацінскай Амерыцы.
«Візіт нашага кіраўніка дзяржавы, які толькі што, які нядаўна завяршыўся, у краіны Паўднёва-Усходняй Азіі — яскравае таму пацвярджэнне.
Беларускія ВНУ штогод прымаюць сотні замежных студэнтаў, якія вяртаюцца дадому і расказваюць праўду пра нашу дзяржаву. Мы паслядоўна пашыраем узаемадзеянне з дзяржавамі, якія падзяляюць нашы каштоўнасці — павагу да суверэнітэту і канструктыўны дыялог. Беларусь ідзе да партнёраў як раўнапраўны палітычны суб’ект з рэальнымі кампетэнцыямі ў прамысловасці, сельскай гаспадарцы, адукацыі, медыцыне.
Свет будучыні — гэта свет, у якім кожны народ мае права на ўласны шлях. Беларусь паслядоўна адстойвае менавіта такую архітэктуру. Без дыктату, без двайных стандартаў, на аснове павагі і ўзаемнай выгады. Сапраўдная сіла XXI стагоддзя — гэта не здольнасць нашкодзіць, а здольнасць дамаўляцца, прадухіляць канфлікты і будаваць давер там, дзе яго ўжо амаль не засталося.
Менавіта такой мы хочам бачыць міжнародную сістэму. Менавіта такі вобраз Беларусі мы адстойваем перад усёй сусветнай супольнасцю. Адкрытая краіна, мірная краіна, краіна, якой ёсць што сказаць свету», — сказаў ён.
Дзяржаўны сакратар Савета бяспекі таксама адзначыў складаную абстаноўку вакол Беларусі, але, паводле яго слоў, краіна знаходзіцца пад кантролем сілавога блока.
«Міжнародная абстаноўка накалена да мяжы. Вы бачыце, што адбываецца каля нашых межаў. Нягледзячы на гэта, мы кантралюем сітуацыю. Краіна знаходзіцца пад надзейнай абаронай сілавога блока.
Разам з тым незалежнасць патрабуе адзінства і агульнай адказнасці за лёс нашай дзяржавы. Беларусы цаной жыцця цэлага пакалення заплацілі за сённяшні дабрабыт.
Мы абавязаныя берагчы тое, што сёння маем. Беражыце мір. Ён крохкі. Беражыце сям’ю. Яна — падмурак. Беражыце краіну. Яна наша. Як кажа кіраўнік дзяржавы, іншай няма і не будзе. Мы самі вызначаем сваю будучыню. Мы спадчыннікі пераможцаў, і мы павінны быць годнымі гэтага звання», — заключыў ён.
