Святлана Ціханоўская на платформе Х выказала ўдзячнасць ЗША за намаганні па вызваленні палітвязняў.
“Я высока ацэньваю намаганні спецыяльнага пасланніка ЗША Джона Коўла і прэзідэнта Трампа па забеспячэнні вызвалення палітычных закладнікаў у Беларусі. Як я ўжо казала, у Злучаных Штатаў ёсць рычагі ўплыву, каб дапамагчы гэтаму адбыцца. Гаворка ідзе пра выратаванне жыццяў людзей. Кожны дзень мае значэнне”, — гаворыцца ў англамоўным запісе.
Трэба адзначыць, што на гэтым тыдні чакаецца візіт амерыканскай дэлегацыі на чале з Джонам Коўлам у Мінск. Паводле інфармацыі літоўскіх СМІ, ён прыбудзе 18 сакавіка ў Вільнюс, а затым накіруецца ў беларускую сталіцу.
У пятніцу Аляксандр Лукашэнка таксама пацвердзіў хуткую сустрэчу з амерыканцамі. Сярод тэм перамоў ён назваў палітвязняў, аднаўленне працы пасольства, эканоміку і санкцыі.
