Святлана Ціханоўская пракаментавала атаку на аўтобус з беларусамі ў Бранскай вобласці, заявіўшы, што беларусы зноў становяцца ахвярамі вайны, якую Расія развязала супраць Украіны.
«Ужо другі раз за два тыдні аўтобус з беларусамі трапляе пад удар на тэрыторыі Расіі. У чарговы раз нашы людзі становяцца ахвярамі злачыннай вайны, якую Расія развязала супраць Украіны, і працягвае ўцягваць у яе і нашу Беларусь», — падкрэсліла яна.
Лідарка дэмсіл усклала адказнасць на палітыку Аляксандра Лукашэнкі і заявіла, што ўлады ігнаруюць пагрозы і працягваюць дапускаць паездкі беларусаў у Расію.
«Гэта таксама наступствы безадказнай палітыкі Лукашэнкі і рэжымнай прапаганды, якія ўпарта падтрымліваюць гэтую вайну, і тых прадстаўнікоў улады, якія ігнаруюць пагрозы і працягваюць адпраўляць беларусаў у Расію. Заклікаю вас: не ездзіце ў Расію. Нехта зарабляе на турах туды, нібы там бяспечна, — гэта не так. А так званым уладам, падобна, усё адно, колькі яшчэ беларусаў пацерпіць. Беражыце сябе», — заклікала яна.
Нагадаем, днём 2 ліпеня беларускі турыстычны аўтобус «Мінск — Анапа» трапіў пад удар дрона ў Злынкаўскім раёне Бранскай вобласці Расіі. У салоне знаходзіліся 19 пасажыраў. Усіх грамадзян Беларусі даставілі ў Гомельскую вобласць, шэсць расіян засталіся ў пункце часовага размяшчэння ў Бранскай вобласці.
Следчы камітэт РФ заявіў, што ўдар быў здзейснены ўкраінскімі войскамі, і ўзбудзіў крымінальную справу аб тэракце. Цэнтр супрацьдзеяння дэзінфармацыі СНБА Украіны назваў заявы пра ўдар украінскага дрона па беларускім аўтобусе ў Бранскай вобласці правакацыяй расійскай прапаганды.
Раней, 17 чэрвеня, аўтобус з беларускімі дзецьмі, якія накіроўваліся на адпачынак у расійскі Геленджык, быў атакаваны, як мяркуецца, беспілотнікам у Бранскай вобласці Расіі. У выніку загінула жанчына, якая суправаджала групу, восем чалавек, у тым ліку шасцёра дзяцей, атрымалі раненні. Масква заяўляе, што аўтобус быў атакаваны ўкраінскім дронам, Кіеў адхіляе гэтыя абвінавачанні і называе тое, што адбылося, інфармацыйнай правакацыяй.
