Святлана Ціханоўская на гэтым тыдні возьме ўдзел у Мюнхенскай канферэнцыі па бяспецы. Яе ўдзел анансавалі арганізатары канферэнцыі.
Мюнхенская канферэнцыя па бяспецы пройдзе 13–15 лютага. Яна адбудзецца ў 62-гі раз. Святлана Ціханоўская ўдзельнічае ў ёй з 2022 года.
Сёлета на канферэнцыю збяруцца не менш за 50 кіраўнікоў дзяржаў і ўрадаў, у тым ліку еўрапейскіх краін, а таксама вялікая дэлегацыя ўрада Германіі.
«Ва ўмовах, калі даўнія саюзы ставяцца пад сумнеў, заснаваны на правілах міжнародны парадак слабее, нестабільнасць нарастае, а канфлікты па ўсім свеце абвастраюцца, Мюнхенская канферэнцыя па бяспецы гэтага года праходзіць у пераломны момант.
Сярод тэм, якія будуць абмяркоўвацца на MSC 2026, — еўрапейская бяспека і абарона, будучыня трансатлантычных адносін, адраджэнне шматбаковага супрацоўніцтва, канкуруючыя канцэпцыі глабальнага парадку, рэгіянальныя канфлікты і наступствы тэхналагічнага прагрэсу для бяспекі, і гэта толькі некаторыя з іх», — гаворыцца ў анонсе мерапрыемства.
