Святлана Ціханоўская асудзіла расійскія ўдары па ўкраінскіх гарадах.
“Нанясенне ўдараў па жылых дамах і энергетычнай інфраструктуры ва ўмовах смяротнага холаду — гэта ваеннае злачынства. Дыктатары разумеюць толькі мову сілы. Свет павінен цвёрда ўстаць на абарону Украіны і пазбавіць расійскую ваенную машыну сродкаў для працягу гэтай агрэсіі”, — напісала яна ў сетцы Х, каментуючы допіс міністра замежных спраў Украіны Андрэя Сібігі.
У сваім запісе Сібіга падкрэсліў, што ні дыпламатычныя намаганні ў ААЭ, ні абяцанні, дадзеныя ЗША, не стрымалі Уладзіміра Пуціна.
“Асноўныя мэты: энергетычныя рэсурсы і жылыя дамы ў Кіеве, Дняпры, Харкаве, Сумах, Адэсе і іншых рэгіёнах. Пуцін дачакаўся паніжэння тэмпературы і назапасіў беспілотнікі і ракеты, каб працягнуць свае генацыдныя атакі супраць украінскага народа. Ні чаканыя дыпламатычныя намаганні ў Абу-Дабі на гэтым тыдні, ні яго абяцанні Злучаным Штатам не перашкодзілі яму працягваць тэрор супраць простых людзей у самую суровую зіму”, — заявіў ён.
Сёння РФ ужыла па тэрыторыі Украіны 521 сродак паражэння, уключаючы беспілотнікі, крылатыя і балістычныя ракеты. Зафіксаваныя трапленні 27 ракет і 31 беспілотніка ў 27 лакацыях. Падзенні абломкаў БПЛА — у 17 лакацыях. Без ацяплення засталіся тысячы дамоў у Харкаве і Кіеве. Ад электразабеспячэння адключаныя дзясяткі тысяч абанентаў у Адэскай вобласці.
