Цэнтр беларускай салідарнасці (ЦБС) у Варшаве заявіў аб гатоўнасці аказваць комплексную і практычную дапамогу былым беларускім палітычным зняволеным і іх сем’ям, якія будуць вымушана прыбываць у Польшчу.
У арганізацыі падкрэсліваюць, што вызваленне — гэта толькі пачатак шляху.
“Наперадзе — новыя выклікі: эміграцыя, легалізацыя, аднаўленне пасля траўмы. Таму мы хацелі б стаць адной з апор, на якую маглі б разлічваць былыя палітычныя зняволеныя”, — адзначаюць у ЦБС.
Цэнтр плануе аказваць дапамогу па некалькіх напрамках. У прыватнасці, гаворка ідзе пра арганізацыю часовага размяшчэння пасля прыезду ў Польшчу, уключаючы дапамогу з засяленнем у гасцініцы. Юрыдычны аддзел ЦБС будзе суправаджаць былых палітвязняў у пытаннях легальнага знаходжання, афармлення дакументаў і арыентавання ў польскай прававой сістэме.
Таксама ў цэнтры адкрыюцца афлайн-групы па вывучэнні польскай мовы ў Варшаве, а для тых, хто будзе жыць за межамі сталіцы, прадугледжаныя анлайн-курсы. Асобная ўвага будзе нададзена падтрымцы сем’яў і дзяцей: дзеці былых палітвязняў змогуць адразу далучыцца да школы дадатковай адукацыі ЦБС, дзе для іх будуць даступныя заняткі па польскай і англійскай мовах, арт-тэрапія, псіхалагічная дапамога і іншыя праграмы.
Асобным напрамкам стане псіхалагічная падтрымка. У ЦБС працуе псіхолаг, а пры неабходнасці да працы будуць прыцягнутыя дадатковыя спецыялісты для індывідуальных кансультацый і групавой падтрымкі.
Акрамя таго, Цэнтр беларускай салідарнасці ў Варшаве будзе адкрыты як бяспечная і даступная прастора, дзе можна папрацаваць, сустрэцца з людзьмі, выпіць кавы ці гарбаты і не заставацца сам-насам з цяжкасцямі.
У арганізацыі падкрэсліваюць, што дапамагаюць усім беларусам, якія знаходзяцца ў вымушанай эміграцыі, аднак былыя палітвязні застаюцца безумоўным прыярытэтам незалежна ад часу іх прыезду ў Польшчу.
Для сувязі з ЦБС ёсць некалькі каналаў:
- [email protected] — агульны канал ЦБС;
- [email protected] — дырэктар ЦБС, можна звяртацца па любых пытаннях;
- [email protected] — запіс на юрыдычныя кансультацыі;
- @CBSschool — тэлеграм школы ЦБС — усе пытанні, звязаныя з адукацыяй дзяцей і моўнымі курсамі для дарослых.
Падтрымаць ЦБС можна па спасылцы. Усе сродкі накіроўваюцца на дапамогу былым палітычным зняволеным.
