Дэпартамент міграцыі міністэрства ўнутраных спраў Грузіі другі раз адмовіў беларускаму праваабаронцу з Брэста Раману Кісляку ў палітычным прытулку. Рашэнне было прынята яшчэ ў снежні мінулага года, аднак стала вядома толькі цяпер, піша “Радыё Свабода”.
Паводле слоў Кісляка, гэта быў паўторны зварот па прытулку па новых абставінах. З 1 кастрычніка мінулага года ў Грузіі пачала дзейнічаць новая працэдура атрымання прытулку, пры якой заява суіскальніка спачатку павінна быць прызнана прымальнай. Менавіта на гэтай першай стадыі праваабаронцу і адмовілі. Пры гэтым дэпартамент павінен быў разгледзець пытанне за 10 дзён, аднак зацягнуў працэдуру на чатыры месяцы.
«Падобна, яны проста забыліся пра мяне, а калі я нагадаў пра сябе, то заднім чыслом аформілі адмову», — сказаў ён.
Праваабаронца пакінуў Беларусь у ліпені 2021 года, асцерагаючыся рэпрэсій, і з таго часу дамагваецца палітычнага прытулку ў Грузіі. У 2023 годзе дэпартамент міграцыі ўжо адмаўляў яму ў прытулку, аднак гарадскі суд Тбілісі адмяніў гэта рашэнне. Пасля апеляцыйны суд аднавіў рашэнне дэпартамента ў сіле. Тады Кісляк падаў скаргу ў Камітэт ААН па правах чалавека, што дазволіла яму застацца ў краіне.
Цяпер праваабаронца мае намер абскардзіць новую адмову ў гарадскім судзе Тбілісі. У Грузіі ён працягвае праваабарончую дзейнасць — кансультуе беларусаў, якія апынуліся ў гэтай краіне. Паводле даных праваабаронцаў, у Грузіі знаходзіцца да ста суіскальнікаў прытулку з Беларусі.
