У Расіі завяршылі расследаванне крымінальнай справы ў дачыненні да беларуса Уладзіміра Віцікава, які кінуў двухгадовае дзіця на падлогу ў аэрапорце Шарамеццева. 31-гадовага беларуса абвінавачваюць у замаху на забойства, паведамляе Галоўнае следчае ўпраўленне Следчага камітэта РФ па Маскоўскай вобласці.
Інцыдэнт адбыўся 23 чэрвеня 2025 года. Як устанавіла следства, мужчына, знаходзячыся ў стане наркатычнага ап’янення, чакаў перасадку на рэйс у зоне прылёту аэрапорта. Ён убачыў паблізу хлопчыка, падняў яго і з сілай кінуў на падлогу. Дзіця было шпіталізавана з траўмамі.
Комплексная псіхолага-псіхіятрычная экспертыза ўстанавіла, што мужчына не можа ўсведамляць фактычны характар і грамадскую небяспеку сваіх дзеянняў. Перад вылетам у Расію ён ужыў наркатычныя рэчывы, што, імаверна, пагоршыла яго хваравіты стан.
Крымінальная справа ў дачыненні да мужчыны накіравана ў суд. Паводле рашэння суда ў дачыненні да абвінавачанага могуць быць ужытыя прымусовыя меры медыцынскага характару.
Абвінавачаны прызнаў сваю віну, паведамляе Маскоўская міжрэгіянальная транспартная пракуратура.
