У горадзе Лукаў (Польшча) паліцэйскія затрымалі беларуса, які паводзіў сябе агрэсіўна і абражаў паліцэйскіх. Яго дэпартавалі з забаронай на ўезд у Шэнген на сем гадоў.
У нядзелю ў паліцыю паступіла паведамленне пра трох пасажыраў на чыгуначнай станцыі Лукава, якія ўладкавалі скандал. Паліцэйскія, якія прыбылі на месца, убачылі трох чалавек, адзін з якіх выглядаў п’яным і паводзіў сябе вельмі агрэсіўна. Ён пачаў абражаць паліцэйскіх.
Паліцэйскія ўстанавілі асобу мужчыны. Аказалася, што гэта 35-гадовы грамадзянін Беларусі. Ён адмаўляўся выконваць патрабаванні супрацоўнікаў паліцыі і біў іх нагамі, паведамляе паліцыя Лукава.
У затрыманага знайшлі некалькі грамаў амфетаміну і больш за 10 пачак цыгарэт без польскіх акцызных марак. Наркотыкі і цыгарэты былі канфіскаваныя.
Беларус правёў ноч у камеры, а на наступны дзень яму прад’явілі абвінавачанні. Паліцэйскія таксама запатрабавалі дэпартацыі беларуса з Польшчы і даставілі яго на пагранічную заставу ў Бяла-Падлясцы. Суд вынес рашэнне аб дэпартацыі затрыманага ў Беларусь з забаронай на ўезд у краіны Шэнгенскай зоны на 7 гадоў.