Хакерская групоўка «Кіберпартызаны» сцвярджае, што ўстанавіла месца пражывання Анжалікі Мельнікавай. Цяпер яна разам з дочкамі жыве ў Мінску.
Анжаліка Мельнікава, былая спікерка Каардынацыйнай рады, знікла ў сакавіку 2025 года. «Кіберпартызаны» аднавілі храналогію падзей, пачынаючы з 2020 года.
У жніўні Анжаліка Мельнікава і яе муж Андрэй Мельнікаў удзельнічалі ў пратэстах. Анжаліку двойчы судзілі паводле адміністрацыйнага артыкула 23.34. Андрэя судзілі паводле таго ж артыкула адзін раз.
3 верасня сям’я з дзецьмі пераехала ў Кіеў, а ў 2021 годзе — у Беласток (Польшча). Ад’езд з Беларусі тлумачыўся палітычным пераследам. Нягледзячы на гэта, Андрэй кожныя некалькі месяцаў працягваў ездзіць у Беларусь. Анжаліка апошні раз была ў Беларусі 14 студзеня 2022 года.
У 2022 годзе шлюб Мельнікавых распаўся, але праз некаторы час сужэнцы аднавілі сумеснае пражыванне дзеля выхавання дзяцей. Кожны з іх меў сваё асабістае жыццё.
Як ужо паведамлялася раней, Анжаліка кантактавала з супрацоўнікам контрразведкі КДБ Аляксеем Лабеевым (пашпарт прыкрыцця на імя Аляксея Гардзеева). Вядома пра некалькі паездак Мельнікавай ў адзін і той жа час і ў адно і тое ж месца разам з Лабеевым.
Да канца студзеня 2025 года Мельнікава выконвала абавязкі па фондзе Białoruś Liberty. У лютым пачаліся пераводы з рахунку фонду на невядомыя мэты. Мельнікава некалькі разоў вывела на асабісты рахунак розныя сумы да 2500 долараў. У каментарыі да аднаго з пераводаў яна пазначыла, што гэта нібыта на патрэбы Каардынацыйнай рады.
24 лютага 2025 года Мельнікаву апошні раз бачылі на працы.
Праз два дні яна пакінула тэрыторыю Польшчы і вылецела з дочкамі ў Вялікабрытанію.
28 лютага яна прыбыла з Вялікабрытаніі на Шры-Ланку. У той жа дзень на Шры-Ланку прыбыў Лабееў у суправаджэнні калегі «Мікалая». Абодва выкарыстоўвалі для паездкі пашпарты прыкрыцця.
2 сакавіка Андрэй Мельнікаў тэрмінова прадаў свой аўтамабіль Mercedes Benz E300. 3 сакавіка ён вынес з кватэры ў Варшаве ўсе магчымыя рэчы і выехаў у Беларусь. «Кіберпартызаны» лічаць, што ад’езд быў незапланаваным, Андрэй дзейнічаў паспешліва, «але з разуменнем, што яго знаходжанне ў Беларусі спатрэбіцца надоўга».
5 сакавіка Анжаліка паведаміла на працы, што захварэла. Яна вывела з рахунку фонду Białoruś Liberty практычна ўсе грошы.
6–7 сакавіка ў Google-акаўнт Мельнікавай увайшлі з нетыповага IP. Былі спампаваныя дакументы Каардынацыйнай рады: даклады, тэксты інтэрв’ю, даведкі, афіцыйныя звароты, стратэгічныя планы.
7 сакавіка супрацоўнік КДБ «Мікалай», які суправаджаў Лабеева, пакінуў Шры-Ланку адзін і вярнуўся ў Беларусь. Мельнікава ў той жа дзень вылецела ў Дубай, імаверна, разам з Лабеевым.
12 сакавіка зноў быў ажыццёўлены ўваход у Google-акаўнт Мельнікавай з нетыповага IP для спампоўвання дакументаў. На рахунак фонду Białoruś Liberty паступіў грант для Каардынацыйнай рады.
18 сакавіка Мельнікава зноў вывела з рахунку амаль усе даступныя сродкі.
Мельнікава перыядычна падтрымлівала сувязь з калегамі. 25 сакавіка яна перастала выходзіць на сувязь.
След дачок Мельнікавай губляецца з канца лютага. 31 сакавіка журналістам удалося даведацца, што дзеці знаходзяцца ў Нясвіжы разам з бацькам. 7 красавіка гэтую інфармацыю пацвердзіў журналістам Андрэй, дадаўшы, што не ведае, дзе знаходзіцца Анжаліка.
Андрэй Мельнікаў знаходзіўся ў Беларусі да 5 ліпеня 2025 года. Адтуль ён вылецеў у Дубай, дзе амаль тры месяцы жыў адзін, а затым вярнуўся на пастаяннае пражыванне ў Польшчу, але працягвае рэгулярна ездзіць у Беларусь. «Кіберпартызаны» спрабавалі з ім паразмаўляць, але ён адмовіўся ад каментароў і кінуў слухаўку.
У сакавіку 2026 года ў інтэрнэце з’явіліся фатаграфіі жанчыны, падобнай да Мельнікавай, зробленыя ў мінскай спартзале. Бацька Анжалікі заявіў журналістам па тэлефоне, што яна «даўно ў Беларусі».
У верасні 2025 года і ў студзені 2026 года на імя Мельнікавай былі аформленыя здзелкі на куплю дзвюх кватэр у Мінску на вуліцы Любімава і на вул. Мсціслаўца (ЖК «Маяк Мінска»).
Пры гэтым у маі 2025 года кватэра ў ЖК «Маяк» была аформлена на асобу з падробленымі дакументамі, выдадзенымі на імя Ангеліны Радзівонавай. Затым у жніўні 2025 года яна была прададзена, імаверна, супрацоўніку контрразведкі КДБ Аляксею Лабееву з падстаўнымі дакументамі на імя Чалаеў Аляксей Вітальевіч. А пасля гэтага ўжо аформлена на сапраўдны пашпарт Анжалікі Мельнікавай.
Паводле інфармацыі «Кіберпартызан», Анжаліка Мельнікава з дзецьмі цяпер пражывае ў Мінску ў кватэры на вул. Мсціслаўца.
«Мы працягнулі працаваць у гэтым кірунку пошуку і, дзякуючы новым крыніцам інфармацыі, пацвердзілі, што Анжаліцы Мельнікавай насамрэч належыць вышэйзгаданая нерухомасць. Мы таксама атрымалі доказы таго, што ў цяперашні момант Мельнікава знаходзіцца ў Мінску разам з дзвюма дочкамі і пражывае ў кватэры па адрасе Пятра Мсціслаўца, д. 24. Акрамя таго, пашпарт на імя РАДЗІВОНАВА АНГЕЛІНА АЛЯКСЕЕЎНА 1990-02-02 належыць ёй. Мельнікава перыядычна карыстаецца гэтым дакументам, каб хаваць сваю асобу.
Такім чынам, мы ўстанавілі факт таго, што Мельнікава сапраўды жывая і пастаянна пражывае ў Мінску. Наяўнасць пашпарта прыкрыцця дазваляе зрабіць выснову, што незалежна ад матываў такога ўчынку яна пайшла на супрацоўніцтва з КДБ», — заяўляюць «Кіберпартызаны».
