Старшыня Рэспубліканскай камісіі па правядзенні ацэнкі сімволікі, атрыбутыкі, інфармацыйнай прадукцыі Лілія Ананіч падвяла вынікі дзейнасці камісіі за год і анансавала новыя забароны.
Зараз у рэспубліканскі спіс «экстрэмісцкіх матэрыялаў» уваходзіць больш за 9 тысяч рэсурсаў, а ў спіс друкаваных выданняў, забароненых да распаўсюджвання, — 225 выданняў. З іх 190 былі дададзены ў 2025 годзе.
Паводле слоў Ананіч, за год абласныя камісіі разгледзелі 470 аб’ектаў. У 456 з іх былі выяўлены прыкметы «экстрэмізму», у 4 — рэабілітацыі нацызму. У рэспубліканскі спіс экстрэмісцкіх выданняў у мінулым годзе было ўключана 171 друкаванае выданне, з іх у 140 знайшлі прыкметы распальвання рэлігійнай варожасці, паведамляе БелТА.
Ананіч растлумачыла забарону кніг адстойваннем суверэнітэту Беларусі.
«Наша краіна з’яўляецца сапраўдным узорам дзяржавы сацыяльнай справядлівасці, міжнацыянальнага, міжканфесійнага міру і традыцыйных каштоўнасцей. Гэтыя каштоўнасці і нашы падыходы не ўбудоўваюцца ў глабалісцкі парадак, які навязваецца свету. Безумоўна, мы адстойваем нашу самабытнасць, бо гэта адстойванне суверэнітэту і незалежнасці Беларусі», — лічыць Ананіч.
Чыноўніца растлумачыла, што камісія дапамагае выяўляць прапаганду нетрадыцыйных каштоўнасцей, прыкметы распальвання варожасці, прапаганду субкультур, не сумяшчальных з традыцыйнымі каштоўнасцямі, і растлумачыла, як працуе камісія.
«Сёння камісійная работа будуецца на вялікай даследчай базе. У складзе камісіі ёсць не толькі прадстаўнікі органаў дзяржкіравання і сілавых структур, але і прызнаныя, аўтарытэтныя спецыялісты ў сферы юрыспрудэнцыі, філасофіі, псіхалогіі, лінгвістыкі, якія маюць і багаты практычны досвед, і вялізны аб’ём навуковых ведаў. Пры неабходнасці камісія робіць запыты ў навуковыя ўстановы, профільныя і іншыя структуры для таго, каб, разглядаючы такія выданні, усвядомлена і абгрунтавана прымаць рашэнні», — заявіла Ананіч.
Ананіч падкрэсліла, што распаўсюднікі друкаваных выданняў павінны мець «чоткія дзяржаўныя арыенціры».
Паводле яе слоў, у Беларусі выданні з «чужымі» каштоўнасцямі з’яўляюцца рэдка, у асноўным гэта прывазная літаратура і пераклады заходніх аўтараў.
Старшыня камісіі анансавала новыя забароны.
«На камісіі будуць разгледжаны новыя аб’екты ацэнкі. Думаю, што гэта дэструктыўнае поле, на вялікі жаль, будзе пашырацца. З другога боку, мы бачым, што арыентацыя распаўсюднікаў і сістэмная работа дзяржорганаў са сваімі суб’ектамі дае свае плады. Хоць сёння сказаць, што зроблена ўсё, не атрымліваецца. Гэта будзе няправільна, бо супрацьстаянне нарастае, набірае абароты. Мы ўсе ведаем, што ментальная агрэсія — гэта складовая частка гібрыднай вайны, якая вядзецца супраць нашай краіны і супраць падобных да нашай краін, якія хочуць суверэнна развівацца і будаваць сваё жыццё», — заявіла Ананіч.
У спіс кніг, забароненых да распаўсюджвання ў Беларусі, уваходзіць 225 твораў — ад кніг для дзяцей «Адкуль бяруцца дзеці» да «Нашы суседзі па планеце. Апавяданні пра дзікіх жывёл» да вядомых раманаў Уільяма Бероўза і Ірвіна Уэлша.
На мінулым тыдні сілавікі правялі рэйд па беларускіх выдаўцах і распаўсюдніках кніг. Была затрымана сям’я Багдановічаў, звязаная з выдавецтвам «Тэхналогія». Выдавецтва Gutenberg Publisher было прызнана «экстрэмісцкім фарміраваннем».
