Літва атрымлівала інфармацыю пра магчымыя правакацыі з боку Расіі. Пра гэта ў інтэрв’ю BNS паведаміў прэзідэнт краіны Гітанас Наўседа.
“Мы атрымліваем такія сігналы ад нашых службаў. Яны не дазваляюць дакладна вызначыць месца або час, таму што гэта проста немагчыма, паколькі іншы бок не заўсёды можа знаходзіцца на завяршальнай стадыі працэсу планавання, і мы ведаем толькі пра само планаванне або пра саму мэту. Гэта праўда, я не магу адмаўляць, што ў нас ёсць такая інфармацыя і што гаворка ідзе пра кінетычныя аперацыі, не маштабныя, але тым не менш мэтанакіраваныя, якія, вельмі верагодна, могуць быць скіраваныя супраць аб’ектаў крытычнай інфраструктуры.
З гэтай мэтай я мабілізаваў і склікаў адказныя службы, і мы прынялі рашэнні, накіраваныя на ўзмацненне абароны гэтых аб’ектаў. Але калі мы перадаём такія паведамленні або мае калегі ў іншых краінах перадаюць іх, у пэўным сэнсе гэта таксама мае прэвентыўны характар, паколькі мы проста заяўляем і паказваем, што мы дасведчаныя пра намеры недружалюбнай дзяржавы на Усходзе і што яны павінны ведаць, што мы ў курсе”, — сказаў ён.
Паводле слоў Наўседы, гаворка можа ісці пра планы пашкодзіць крытычна важную інфраструктуру.
“Усё, што можа проста спыніць функцыянаванне гэтых аб’ектаў, паколькі самі аб’екты важныя не толькі самі па сабе, але і для функцыянавання ўсёй сістэмы, у прыватнасці, для нашай сінхранізацыі з кантынентальнай еўрапейскай сістэмай, павінна выклікаць у нас першачарговую заклапочанасць”, — сказаў ён, дадаўшы, што гаворка ідзе як пра энергетычную, так і пра транспартную інфраструктуру.
Наўседа таксама адзначыў, што інфармацыя датычылася не тэрыторыі Літвы. «Суседнія краіны» — так ён апісаў магчымыя месцы правакацый.
