На першыя вучэнні кааліцыі ахвотных у Польшчу ў верасні прыбудуць 1,5 тыс. вайскоўцаў з Францыі і Вялікабрытаніі. Пра гэта ў ранішнім эфіры TVP Info заявіў намеснік міністра абароны Польшчы Павел Бейда. Учора правядзенне першых сумесных манеўраў кааліцыі анансаваў польскі прэм’ер-міністр Дональд Туск.
“Каля 1,5 тыс. вайскоўцаў прыбудуць з Вялікабрытаніі і Францыі. Гэта будуць так званыя лагістычныя і транспартныя манеўры, гэта значыць мы рыхтуемся да пэўных мерапрыемстваў, звязаных з перакідкай войскаў, транспартаваннем войскаў. Мы проста хочам прадэманстраваць, што можам гэта зрабіць”, — сказаў ён.
Бейда нагадаў, што з моманту пачатку поўнамаштабнага ўварвання РФ ва Украіну Польшча забяспечвае да 95% аб’ёмаў перакідкі розных відаў тэхнікі і ўзбраення ва Украіну.
Намеснік міністра таксама адзначыў, што вучэнні могуць служыць сігналам для Расіі.
“Так, мы хацелі б, каб Расія таксама гэта зразумела. Што мы гатовыя да ўсіх магчымых сцэнарыяў і можам разлічваць на нашых саюзнікаў, саюзнікаў па НАТА”, — дадаў ён.
Паводле яго слоў, таксама можа ісці гаворка пра пастаянную прысутнасць французскіх войскаў у Польшчы.
“Мы атрымалі сігналы з французскага боку. Мы абмяркуем гэта. Любая колькасць саюзных войскаў у Польшчы, пастаянна дыслакаваных саюзных войскаў, настойліва вітаецца. Таму, думаю, гэтыя абмеркаванні яшчэ наперадзе”, — сказаў ён.
