У Мінску 17–18 лютага прайшлі масавыя затрыманні выдаўцоў і распаўсюднікаў кніг, піша «Наша Ніва». Паводле інфармацыі выдання, у некаторых сем’ях затрымалі па некалькі чалавек. Падчас ператрусаў ва ўсіх прысутных у кватэрах і офісах правяралі тэлефоны.
Аўтары сцвярджаюць, што ператрусы і затрыманні “былі не адзінкавымі і не выпадковымі, а сістэмнымі, спланаванымі”.
“Прыходзілі як да супрацоўнікаў дзейных, так і раней закрытых выдавецтваў, як да кіраўнікоў выдавецтваў, так і да звычайных работнікаў. А таксама да прадпрымальнікаў, якія займаюцца распаўсюдам кніжнай прадукцыі. Усе затрыманыя маюць вялікія заслугі перад беларускай культурай. Што менавіта шукалі, пакуль не зразумела”, — гаворыцца ў матэрыяле.
Раней, у мінулыя месяцы, арышты прайшлі ў некалькіх іншых супольнасцях рознага тыпу ў сталіцы і рэгіёнах. Мяркуючы па інфармацыі, што паступае, там шукалі доказы фінансавання з фондаў салідарнасці або сувязі з беларусамі за мяжой, адзначаюць аўтары.
Сёння з’явілася інфармацыя, што першае ў Беларусі прыватнае выдавецтва «Тэхналогія» прыпыніла сваю працу.
«Па пэўных прычынах выдавецтва «Тэхналогія» не працуе», — гаворыцца ў паведамленні кампаніі ў Facebook.
Падрабязнасці не раскрываюцца.
