Амерыканскія вайскоўцы збілі іранскі беспілотнік, які наблізіўся да авіяносца USS Abraham Lincoln, паведамляе Reuters.
«Знішчальнік F-35C з авіяносца USS Abraham Lincoln збіў іранскі беспілотнік з мэтай самаабароны і абароны авіяносца і персаналу, які знаходзіўся на яго борце», — заявіў капітан ВМС Цім Хокінс, прадстаўнік Цэнтральнага камандавання, перадае агенцтва.
Паведамляецца, што ў напрамку авіяносца ляцеў беспілотнік Shahed-139.
Гэта не адзіны інцыдэнт паміж ЗША і Іранам, які адбыўся ў аўторак. Сілы КСІР пераследавалі гандлёвае судна пад амерыканскім сцягам з амерыканскім экіпажам.
«Два кацеры Корпуса вартавых ісламскай рэвалюцыі і іранскі беспілотнік „Мохаджэр“ наблізіліся да танкера M/V Stena Imperative на высокай хуткасці і прыгразілі падняцца на борт і захапіць судна», — заявіў Хокінс.
Танкер паскорыўся і пазбег захопу. Пры гэтым у раёне інцыдэнту дзейнічаў карабель ВМС ЗША McFaul. Ён суправадзіў судна.
Інцыдэнты адбыліся на фоне падрыхтоўкі перамоваў паміж ЗША і Іранам. Чакаецца, што яны адбудуцца ў пятніцу ў Амане.
