Дзяржсакратар Савета бяспекі Беларусі Аляксандр Вальфовіч лічыць, што ў Беларусі немагчыма паўтарэнне венесуэльскага сцэнарыя, бо сілавікі і народ не могуць здрадзіць Аляксандру Лукашэнку.
Вальфовіч выказаў здагадку, што ЗША змаглі затрымаць прэзідэнта Венесуэлы Нікаласа Мадуру дзякуючы здрадзе ў яго атачэнні.
«На тэрыторыі Венесуэлы, на жаль, напэўна, спрацаваў фактар здрады ў дачыненні да прэзідэнта, у дачыненні да дзеючай улады. Вось так беспардонна, бяспечна праляцець па тэрыторыі чужой дзяржавы верталётамі, не атрымаўшы ніякіх нават папераджальных стрэлаў, скажам так, — гэта проста немагчыма», — заявіў Вальфовіч тэлеканалу «Беларусь 1».
Дзяржсакратар Савета бяспекі ўпэўнены, што падобнае не можа адбыцца ў Беларусі.
«На нашай тэрыторыі гэта немагчыма, па-першае, таму што людзі ў пагонах не здольныя да здрады. Беларускі народ, мы не можам здрадзіць свайму прэзідэнту, проста не маем на гэта права», — лічыць Вальфовіч.
Ён падкрэсліў, што на выпадак «немагчымых сітуацый» у Беларусі распрацаваны неабходныя дакументы.
«А па-другое, прэзідэнт ужо казаў, у нас, акрамя, скажам так, зусім немагчымых сітуацый, звязаных з ліквідацыяй прэзідэнта, з вывадам прэзідэнта з кіраўнічай ролі прэзідэнта, у нас прыняты ўсе заканадаўчыя дакументы на ўзроўні Савета бяспекі, дзе незалежна, ці ёсць прэзідэнт сёння на сваім працоўным месцы, ці няма яго на сваім працоўным месцы, Савет бяспекі збіраецца, прымае адпаведныя рашэнні, і кіраванне краінай, кіраванне дзяржавай не губляецца ні на хвіліну.
Таму ад нейкай канкрэтнай асобы на тэрыторыі Рэспублікі Беларусь не залежыць, будзе парадак ці бяспека, ці кіравальнасць на тэрыторыі нашай краіны, ці не будзе. У нас для гэтага ўсе заканадаўчыя акты прыняты, ёсць алгарытмы работы. Дай бог, каб яны ніколі не спатрэбіліся, і я думаю, што яны ніколі не спатрэбяцца, таму што ў нас іншы менталітэт, у нашых людзей, у беларускага народа, у нашых сілавікоў зусім іншы менталітэт. Мы па-іншаму выхаваныя. Па-іншаму нас вучылі любіць сваю радзіму, любіць свой народ беларускі», — заявіў Вальфовіч.
На мінулым тыдні Лукашэнка таксама заяўляў, што Мадуру ўдалося затрымаць з-за змовы і здрады, і падкрэсліў, што венесуэльскі сцэнарый нерэальны ў Беларусі.
