Адзін з самых панкаўскіх, вольных і дасціпных асяродкаў беларускай культуры на Беласточчыне — самаабвешчаная Рэспубліка Біндзюга — рыхтуецца ўжо ў шосты раз прыняць Prekupalle (14–15 жніўня).
Штогадовы лозунг імпрэзы лаканічны: «Музыка — фільмы — ежа», а самі арганізатары з гонарам пазіцыянуюць сваю падзею як «найгоршы фэст на свеце». Урэшце, яны самі жартуюць, што фэст можа і найгоршы, але публіка ў яго — дакладна найлепшая.
Гэтым годам, праўда, не абышлося без райдарных скандалаў: арганізатары прызналіся, што Мадонна на Prekupalle-2026 не прыедзе. Спявачка нават сама прапаноўвала грошы, каб яе паставілі ў лайн-ап паміж тандырам і баян-рэйвам, але зорцы сусветнай поп-сцэны давялося адмовіць — фармат супольнасці важнейшы.
Адкуль узялася Рэспубліка Біндзюга?
Натхненнем для паўставання незалежнай тэрыторыі ў польскай вёсцы Беньдзюга (Біндзюга) стала слынная літоўская Рэспубліка Ужупіс у Вільнюсе.
«Пабывалі там пару разоў і захапіліся ідэяй незалежнай (творчай) рэспублікі. Знайшлі такую на Падляшшы. Напачатку гэта быў жарт, але я ўспрымаю Рэспубліку Біндзюга як Беларусь, якую б я хацеў мець, але цяпер не магу», — дзеліцца ганаровы патранат фэсту, Прэзідэнт Рэспублікі і дырэктар фестывалю «Бульбамуві» Януш Гаўрылюк.
У Біндзюгі ёсць усё для шчасця: векавы яблыневым сад, рака Нараў і Белавежская пушча па той бок берага. А сам фестываль пачынаўся як сатыра на буйныя пафасныя культурныя імпрэзы, але хутка ператварыўся ў самабытны феномен з дзіўнай сумессю панкаўскага духу, падляшскай дасціпнасці і беларускай свабоды.
Бар 24/7, спектаклі і вершы: поўная праграма-2026
Затое замест Мадонны на пляцоўцы будзе галоўная перамога свайго пяцігадовага юбілею — кругласутачны «Бар з Дахам» з бельгійскай бульбай фры і напоямі.
Навучальна-гастранамічную лінію працягне лекцыя пра мастацтва выпякання ў тандыры ад Дзмітрыя Папова і майстар-класы «Драўляра».
Пятніца, 14 жніўня
Музычны старт падасца а 13:00, а ўжо з 16:00 запрацуе «Свабодная сцэна».
Вечар адкрыюць выступы MikEdKry ды дуэта da kostka & Illa Siŭcoŭ, пасля якіх аб 20:00 з вялікім сэтам выйдзе Алесь Дзянісаў і Сябры.
Пасля начнога кінапаказу гасцей чакае драйвавы панк ад Szczupakabra і начны танцавальны сэт ад DJ Sapieha.
Субота, 15 жніўня
Дзень пачнецца а 10:00 з акцыі «Жнівень Вінаваты».
Апрача тандыра і майстар-класаў, у адукацыйным блоку запланаваная лекцыя паэткі Дар’і Бялькевіч «Канец песням жальбы: ці пішуць беларусіны вясёлыя вершы?» (16:00), а таксама свабодная прастора для беларускіх выдаўцоў і сустрэча з таямнічым госцем А.К.
Музычны марафон суботы расцягнецца з 19:00 да самай раніцы: на сцэну паслядоўна выйдуць Introligator, АЎАЎА, Kurwadziki, Serbski Nož і Kovelskie Psy. Фінальным акордам імпрэзы а першай гадзіне ночы стане выбуховы баян-рэйв ад Microbat.
Спецыяльны эксклюзіў: на працягу фестывалю чатыры разы пакажуць спектакль «Самы маленькі самалёцік у свеце» — гукавыя аб’явы пра час паказаў робяцца прама на пляцоўцы.
Апрача таго, у праграму ўплецены спантанныя джэмы, перформансы і сустрэчы.
Умовы: «Ночы для нармальных»
Уваход на фестываль вольны (але данаты вітаюцца — «дабраўся? малайчына!»). Для начоўкі прапануецца бясплатны намётавы лагер у яблыневым садзе, купанні ў рацэ і легендарная 3-месная рымская прыбіральня для глыбокіх супольных гутарак.
А калі вы не гатовы да паходнага рамантызму, у арганізатараў ёсць асобная опцыя «Noce dla burżujów» («Начлег для буржуяў”) з камфортнымі аграсядзібамі непадалёк.
Падрабязнасці тут.
Падпісвайцеся на культурныя навіны Reform.news у Telegram
