Сям’я школьніка з Баранавіч заявіла пра цкаванне падлетка ў гімназіі №4. Інфармацыю пра булінг апублікавалі ў Threads бацька і старэйшая сястра пацярпелага школьніка Льва Русана. У Instagram быў таксама размешчаны ролік пра цкаванне, зроблены з дапамогай ШІ.
«Майго малодшага брата ўжо 2 гады цкуюць у 4-й гімназіі г. Баранавічы. Паходы і заявы ва ўчастак, лісты вышэйстаячым органам, суды, псіхатэрапеўты – усё бескарысна», — пісала сястра Льва. Да паста былі прыкладзены фота хлопчыка з сінякамі.
У відэа ў Instagram падлетак кажа, што яго некалькі разоў збівалі натоўпам, тапілі заплечнік ва ўнітазе, а ў сталовай саджаюць за апошні стол, за якім нікога няма, і «цкуюць бязлітасна».
Бацька падлетка заяўляе, што яго сына спрабуюць «выціснуць з класа і гімназіі». «Нават мама аднаго з булераў збірала подпісы сярод бацькоў, каб нас выключылі з класа», – сцвярджае ён.
«Буляць цэлы год, звярталіся спачатку: класны кіраўнік, дырэктар, аддзел адукацыі Баранавічаў, аддзел адукацыі Брэста, ГАУС, ІСН, пракуратура, цяпер ідуць судовыя пасяджэнні. Нас спрабуюць паставіць на ўлік у ІСН, спрабуем абскардзіць, бо Леў проста паспрабаваў самаабараніцца – трымаў булера за руку», — заявіў бацька дзіцяці.
На публікацыі адрэагавала міліцыя. Ва УУС Брэсцкага аблвыканкама заявілі, што сітуацыя вывучана на месцы сумесна з прадстаўнікамі органаў кіравання адукацыяй.
«Устаноўлена, што ў класе склалася канфліктная сітуацыя з вучнем, які нядаўна прыбыў, якая патрабуе сацыяльна-педагагічнага суправаджэння. У цяперашні час усімі зацікаўленымі сумесна з бацькамі выпрацавана стратэгія вырашэння інцыдэнту», — заявілі ў міліцыі.
Ва УУС запэўніваюць, што сітуацыя знаходзіцца пад кантролем міліцыі.
