У Беларусі захворвальнасць на рэспіраторныя інфекцыі за тыдзень вырасла на 18%

У Беларусі захворвальнасць на рэспіраторныя інфекцыі за тыдзень з 26 студзеня па 1 лютага вырасла на 18%. Пра гэта паведамілі ў Міністэрстве аховы здароўя. Паводле інфармацыі ведамства, 64,4% захварэлых — дзеці.

Адзначаецца актыўная цыркуляцыя вірусаў грыпу A, пераважна A(H3N2). Таксама ў краіне цыркулююць негрыпозныя ўзбуджальнікі: метапнеўмавірусы, РС-вірус, рынавірусы, адэнавірусы, сезонны каранавірус, вірусы парагрыпу, бокапарвавірусы, вірус SARS-CoV-2.

Міністэрства аховы здароўя таксама дало некаторыя рэкамендацыі па прафілактыцы рэспіраторных інфекцый:

• абмяжуйце (на час) наведванне месцаў або мерапрыемстваў з удзелам вялікай колькасці людзей у закрытых памяшканнях;
• абмяжуйце кантакты з хворымі людзьмі — не наведвайце, без асаблівай патрэбы, паліклінікі і бальніцы;
• наведвайце хворых сваякоў з выкарыстаннем сродкаў абароны органаў дыхання;
• выконвайце правілы гігіены рук — часта мыйце рукі з мылам, ужывайце гігіенічныя і дэзінфікуючыя сурвэткі;
• рэгулярна праветрывайце памяшканні і праводзьце вільготную ўборку, уключаючы дэзінфекцыю паверхняў (тэлефоны, сталы, дзвярныя ручкі і г.д.);
• падтрымлівайце аптымальны ўзровень вільготнасці паветра ў памяшканні (40–60%): цёплы і сухі клімат у памяшканні — гэта ідэальнае асяроддзе для хуткага распаўсюджвання вірусаў;
• выконвайце «рэспіраторны этыкет» — прыкрывайце рот і нос аднаразовай хусткай пры чханні або кашлі, не дакранайцеся рукамі да носа, рота і вачэй;
• правільна выбірайце адзенне для выхаду на вуліцу;
• вядзіце здаровы лад жыцця — спіце 8 гадзін, пазбягайце стрэсаў і ператамлення, загартоўвайцеся, збалансавана харчуйцеся.