Для Украіны важна мець адносіны з беларускімі дэмакратычнымі сіламі. У бліжэйшы час Кіеў прызначыць спецпрадстаўніка па Беларусі, паведаміў у інтэрв’ю «Еўрапейскай праўдзе» міністр замежных спраў Украіны Андрэй Сібіга.
Ён падкрэсліў, што беларускі трэк патрабуе ад Украіны асобнай сістэмнай палітыкі.
«І для нас сапраўды важна захоўваць адносіны з прадстаўнікамі дэмакратычнай Беларусі. Мы верым, што настане час, і Беларусь — дэмакратычная Беларусь — стане чацвёртым удзельнікам Люблінскага трохвугольніка», — заявіў Сібіга.
Паводле слоў міністра, спецпрадстаўнік Украіны па Беларусі будзе кантактаваць з беларускімі дэмсіламі.
«Цяпер я атрымаў даручэнне ад прэзідэнта прызначыць спецыяльнага прадстаўніка і ў бліжэйшы час унясу кандыдатуру на разгляд. Назву гэтай пасады мы яшчэ вызначаем, але гэта будзе службовая асоба, упаўнаважаная на кантакты з дэмакратычнымі беларускімі сіламі», — патлумачыў Сібіга.
Сібіга заявіў, што Кіеў лічыць Аляксандра Лукашэнку «так званым прэзідэнтам» і не лічыць яго легітымна абраным прэзідэнтам Беларусі, а Святлану Ціханоўскую называе адной з лідараў дэмакратычных беларускіх сіл.
«Мы зыходзім з таго, што яна — адзін з лідараў дэмакратычных беларускіх сіл. Таму вы бачылі яе сустрэчу з прэзідэнтам Зяленскім. Дарэчы, размова была вельмі прадметная і будзе мець далейшае развіццё», — сказаў міністр замежных спраў Украіны.
Сібіга таксама заявіў, што Украіна цэніць полк Каліноўскага, які ваюе ў складзе Узброеных сіл Украіны.
Кіраўнік украінскага МЗС пракаментаваў дыялог паміж ЗША і Беларуссю. Ён лічыць, што гэты працэс не прывядзе да выхаду Лукашэнкі з ізаляцыі.
«Мы бачым, што Лукашэнка гуляе. Ён спрабуе ўседзець на некалькіх крэслах. Лукашэнка шукае, як забяспечыць сваю будучыню, бо добра разумее, чым усё гэта скончыцца. Але гэта абсалютна не азначае яго выхад з ізаляцыі.
Дыялог з ЗША тычыцца пэўных момантаў, звязаных з правамі чалавека, з вызваленнем палітычных зняволеных. І тое, што частку зняволеных вярнулі пры ўдзеле Украіны, — гэта таксама прызнанне нашай ролі», — лічыць Сібіга.
На пытанне пра ролю Украіны ў вызваленні або дэакупацыі Беларусі Сібіга адзначыў, што роля Кіева ў рэгіянальных геапалітычных працэсах павінна вырасці.
«Я ўвогуле лічу, што роля Украіны на міжнароднай арэне, у тым ліку ў рэгіянальных геапалітычных працэсах, павінна расці. У тым ліку — па беларускім пытанні, так я гэта назаву», — сказаў міністр.
Сібіга таксама заявіў, што беларускі рэжым і асабіста Лукашэнка павінны панесці адказнасць за саўдзел у агрэсіі Расіі супраць Украіны. На гэтыя словы адрэагавала прэс-сакратар Лукашэнкі Наталля Эйсмант.
Нагадаем, Святлана Ціханоўская і Уладзімір Зяленскі сустрэліся 25 студзеня ў Вільнюсе. Зяленскі запрасіў Ціханоўскую наведаць Кіеў, а лідар беларускіх дэмсіл прапанавала прызначыць спецыяльнага пасланніка па Беларусі.