9 снежня ва Фларэнцыі адкрыліся шэлтар для беларусскіх палітычных уцекачоў і іх сем’яў і Цэнтр беларускай дэмакратычнай супольнасці, паведамляе Офіс Ціханоўскай.
У цырымоніі адкрыцця прыняла ўдзел Светлана Ціханоўская, якая знаходзіцца ў Італіі з рабочым візітам, а таксама прадстаўнікі гарадской і абласной адміністрацыі, прафсаюзаў і палітычных партый: віцэ-прэзідэнт Еўрапейскага парламента Піна Пічэрна, сенатар і былы пасол Марка Ламбардзі, старшыня гарадскога савета Сеста-Ф’ярэнціна Серэна Сасаліні, старшыня Рэгіянальнага савета Тасканы Стэфанія Сакардзі і іншыя.
У шэлтары ўжо пражываюць рэпрэсаваныя беларусы і былы добраахвотнік палка Каліноўскага. Яго адкрыццё стала магчымым дзякуючы папярэднім візітам Ціханоўскай, працы беларускай дыяспары і Юліі Юхно, прадстаўніцы народных пасольстваў і арганізацыі «Talaka». Юхно будзе ўзначальваць Цэнтр беларускай дэмакратычнай супольнасці.
«Цэнтр беларускай дэмакратычнай супольнасці ва Фларэнцыі — наша першая пляцоўка ў Італіі, але, спадзяюся, не апошняя.
Я вельмі ўдзячная Юліі Юхно, яе камандзе і валанцёрам: іх намаганні і настойлівасць зрабілі ўсё гэта магчымым. Цэнтр будзе праводзіць культурныя, адукацыйныя і палітычныя мерапрыемствы, звязаныя з Беларуссю», — адзначыла Ціханоўская.
Яна выказала надзею на тое, што супрацоўніцтва паміж беларускай дыяспарай і мясцовымі ўладамі будзе паглыбляцца.
