Новым паслом Беларусі ў Расіі прызначаны Юрый Селіверстаў, які да гэтага займаў пасаду міністра фінансаў.
Селіверстаў таксама па сумяшчальніцтве будзе з’яўляцца прадстаўніком Беларусі ў інтэграцыйных структурах і надзяляецца паўнамоцтвамі намесніка прэм’ер-міністра.
Да нядаўняга часу паслом Беларусі ў РФ быў Аляксандр Рагожнік. 15 студзеня Аляксандр Лукашэнка прызначыў яго старшынёй Віцебскага аблвыканкама.
Лукашэнка адзначыў, што Селіверстаў — самы прыдатны кандыдат на пасаду пасла, бо ведае пра праблемы ў гандлі паміж Беларуссю і Расіяй.
«Я абсалютна не маю прэтэнзій да вашай працы. Разумеючы, што вы такі чалавек спакойны, я заўсёды імкнуўся вас падштурхоўваць, каб вы, не дай бог, лішняе з бюджэту каму-небудзь не аддалі, хоць такіх фактаў у нас не было. Разумеючы, што вы чалавек, як Дзмітрый Мікалаевіч (Крутой, кіраўнік Адміністрацыі прэзідэнта) кажа, я гэтага, праўда, не бачыў, жорсткі, напорысты, непаседа ў добрым сэнсе, гатовыя мітусіцца па краіне і суседніх іншых краінах.
Я падумаў, а чаму б у Расіі не працаваць такому чалавеку, дзе трэба бываць у рэгіёнах, працаваць, супрацоўнічаць з расійскімі рэгіёнамі, трымаць на кантролі асноўныя напрамкі нашай дзейнасці ў Расійскай Федэрацыі. І перш за ўсё ў гандлі. Вы абсалютна прысвечаны ў гэтыя праблемы. Ведаеце асноўныя праблемы, якія ў нас ёсць у беларуска-расійскіх адносінах. Прыйшоў да высновы, што з усіх кандыдатур, якія прапаноўвалі, напэўна, вы падыдзеце для таго, каб працаваць у Расіі», — заявіў Лукашэнка.
Лукашэнка падкрэсліў, што Расія з’яўляецца для Беларусі асноўным рынкам і галоўным інвестарам.
«Мы часта гаворым, што пасольства ў Расіі — гэта не проста пасольства. Гэта другі ўрад. Таму што гэта наш асноўны рынак, дзе мы прадаём сваю прадукцыю. І гэта асноўная краіна, якая інвестуе ў нас, заўсёды нам дапамагае. Гэта наша Расія. Таму абы-каго туды не пашлеш. І ўзровень павінен быць адпаведны, і веды, і жаданне працаваць. Таму спыніліся на вашай кандыдатуры», — патлумачыў Лукашэнка.
У лістападзе 2025 года Селіверстаў дзяліўся планамі пра прыцягненне дадатковых сродкаў ад Расіі для пагашэння дзярждоўгу.
«Для пагашэння спатрэбіцца прыцягваць дадатковыя рэсурсы, якія мы плануем прыцягнуць з боку фінансавай дапамогі Расійскай Федэрацыі ў адпаведнасці з раней дасягнутымі дамоўленасцямі», — сказаў ён.
Селіверстаў нарадзіўся ў Мінску ў 1978 годзе, скончыў Беларускі дзяржаўны эканамічны ўніверсітэт і Акадэмію кіравання пры прэзідэнце. З 2002 года працаваў у Міністэрстве фінансаў на розных пасадах. У чэрвені 2020 года быў прызначаны міністрам фінансаў.
