Генеральная пракуратура Літвы паведаміла аб пачатку расследавання справы ў дачыненні да грамадзяніна краіны, якога падазраюць у працы на расійскую разведку. Справу распачалі на падставе матэрыялаў Дэпартамента дзяржаўнай бяспекі.
Дэпартамент дзяржаўнай бяспекі атрымаў інфармацыю пра чалавека, які збіраў звесткі, выкарыстоўваючы прыёмы, характэрныя для расійскай разведкі. Падчас аператыўных мерапрыемстваў супрацоўнікі дзяржаўнай бяспекі сабралі даныя, якія сведчаць, што падазраваны, выкарыстоўваючы месенджар Telegram, самастойна ўсталяваў кантакт і выконваў праз пасярэднікаў заданні расійскіх разведвальных службаў.
Паводле звестак следства, ён збіраў інфармацыю пра размешчаныя ў Літве вайсковыя аб’екты, вайсковую тэхніку і яе перамяшчэнні. У прыватнасці, ён фатаграфаваў і перадаваў інфармацыю пра батальён Узброеных сіл Літвы, прадпрыемства па вытворчасці вайсковых радараў і радыёлакацыйных сістэм, перамяшчэнні вайсковай тэхнікі ў Віленскім аэрапорце. Акрамя таго, ён перадаваў матэрыялы з выявамі вайсковай тэхнікі і прапаноўваў збіраць такую інфармацыю падчас знаходжання ў Бельгіі.
Падазраваны ўзаемадзейнічаў з супрацоўнікам Міністэрства абароны РФ.
