Беларусь не закрывае дзверы для заходніх суседзяў. Пра гэта заявіў міністр замежных спраў Максім Рыжанкоў на сённяшняй выніковай калегіі ведамства. Паводле яго слоў, краіна актыўна ўмацоўвае сувязі ў далёкіх рэгіёнах.
“Разам з тым, умацоўваючы сувязі на далёкай дузе ў цэлым, мы не закрываем дзверы і для нашых заходніх суседзяў. Пазіцыя Мінска нязменная: мы за прагматычны дыялог, але толькі на роўных, а не на мове ультыматумаў”, — цытуе яго БелТА.
Паводле яго слоў, работа з краінамі Глабальнага Поўдня пераведзена ў “плоскасць канкрэтнай кааперацыі”.
“Паўнапраўны ўдзел Беларусі ў Шанхайскай арганізацыі супрацоўніцтва і актыўнае ўзаемадзеянне ў фармаце “БРІКС плюс” стварылі новыя вокны магчымасцяў для нашага бізнесу”, — сказаў міністр.
Рыжанкоў канстатаваў захаванне сувязяў з Кітаем, пашырэнне супрацоўніцтва з Індыяй. Паводле яго слоў, запыт на беларускія тэхналогіі і досвед стабільна расце ў краінах Афрыкі, Азіі і Лацінскай Амерыкі.
“Мы за гэты год канчаткова разбурылі міф пра тое, што нас там ніхто не чакае. Наадварот — кантактаў і супрацоўніцтва з намі там шукаюць.
У 2025 годзе Беларусь нарасціла экспарт у Афрыку да $670 млн. Практычна ў паўтара раза (144%) павялічыўся беларускі экспарт у Лацінскую Амерыку, на трэць мы выраслі і на азіяцкім напрамку (133%)”, — сказаў ён.
