Пытанне адмены роўмінгу паміж Беларуссю і Расіяй да канца не вырашанае, застаецца яшчэ шмат нюансаў, заявіў дзяржсакратар Саюзнай дзяржавы Сяргей Глазьеў у інтэрв’ю тэлеканалу «БелРос». Тэкст інтэрв’ю апублікаваны на сайце Пастаяннага камітэта СД.
«Гэтая задача аказалася крыху больш складанай, чым здавалася на першы погляд. Спачатку хацелі проста адмяніць роўмінг. Але па шэрагу тэхнічных пытанняў пайшлі крыху іншым шляхам. Пашырылі аб’ём і тэрмін дзеяння льготных пакетаў, каб грамадзяне рэальна не заўважалі перасячэння мяжы, асабліва тыя, хто прыбывае на кароткі тэрмін — да тыдня, і маглі карыстацца тымі ж тарыфамі, што і ў сябе дома. …І хаця фармальна адмены роўмінгу няма, але тым не менш грамадзяне могуць карыстацца тымі тарыфамі, да якіх яны прывыклі па базавых паслугах тэлефаніі», — расказаў Глазьеў.
Паводле слоў чыноўніка, трэба вырашыць яшчэ шэраг пытанняў, якія датычацца асаблівых паслуг і доступу да інтэрнэту. Нявырашанай застаецца праблема пацвярджэння ідэнтыфікацыі.
«Было прынята рашэнне ісці па інтэграцыі ў партал Дзяржпаслуг з тым, каб можна было праходзіць ідэнтыфікацыю, знаходзячыся ў Беларусі, праз шлюз на расійскім партале Дзяржпаслуг. Я думаю, гэта магістральны кірунак, які будзе рэалізаваны.
Таксама мы палегчылі грамадзянам Беларусі праходжанне ідэнтыфікацыі ў буйных гарадах, асабліва ў Маскве і Санкт-Пецярбургу, з тым, каб яны маглі карыстацца паслугамі ўсіх МФЦ для гэтых мэтаў. Задача, скажу прама, яшчэ канчаткова не вырашана. Хоць большасць ужо прайшла ідэнтыфікацыю, тым не менш засталося вельмі шмат грамадзян, якія гэтага яшчэ не зрабілі», — заявіў Глазьеў.
Праблема ўскладняецца «рэжымам астуджэння» — адключэннем мабільнага інтэрнэту на суткі пры ўездзе ў Расію. Паводле слоў Глазьева, Беларусь і Расія дамовіліся, каб грамадзяне Беларусі атрымлівалі магчымасць такой жа ідэнтыфікацыі, як і расіяне, праз простыя маніпуляцыі на тэлефоне.
Роўмінг паміж Беларуссю і Расіяй абяцаюць адмяніць ужо некалькі гадоў. Першы намеснік міністра сувязі і інфарматызацыі Павел Ткач заяўляў, што ўсе праблемы з роўмінгам будуць вырашаны да канца гэтага года.
