Польскія следчыя органы ўстанавілі асобу чалавека, якога лічаць датычным да гібелі польскага вайскоўца Матэвуша Сітэка на мяжы з Беларуссю. Як паведаміла Акруговая пракуратура Варшавы, падазраваным з’яўляецца грамадзянін Марока Махамед Адамру (Mohamed ADDAMROU).
Паводле даных следства, інцыдэнт адбыўся 28 мая 2024 года ў раёне населенага пункта Дубічы-Цэркеўне на польска-беларускай мяжы. Як сцвярджаюць польскія праваахоўныя органы, мужчына, які знаходзіўся па беларускі бок памежнай агароджы, нанёс сяржанту 1-й Варшаўскай танкавай брыгады Матэвушу Сітэку нажавое раненне праз пралёты плота. Вайсковец быў дастаўлены ў бальніцу, аднак 6 чэрвеня 2024 года памёр у Ваенна-медыцынскім інстытуце ў Варшаве.
У пракуратуры паведамілі, што за два гады расследавання былі дапытаныя больш за 140 сведкаў як у Польшчы, так і за яе межамі, а таксама праведзены крыміналістычныя экспертызы.
21 ліпеня 2025 года следчыя вынеслі пастанову аб прад’яўленні Махамеду Адамру абвінавачання ў забойстве паводле артыкула 148 Крымінальнага кодэкса Польшчы. Пасля гэтага польскі суд санкцыянаваў яго арышт, а праваахоўныя органы абвясцілі падазраванага ў вышук і выдалі Еўрапейскі ордар на арышт.
Паводле інфармацыі пракуратуры, падчас следчых мерапрыемстваў было ўстаноўлена, што падазраваны знаходзіцца на тэрыторыі Беларусі. У сувязі з гэтым 2 снежня 2025 года польскі бок накіраваў беларускім уладам запыт аб яго часовым арышце і экстрадыцыі ў Польшчу.
З-за таго, што падазраваны знаходзіцца па-за межамі Польшчы, а працэдура экстрадыцыі застаецца незавершанай, расследаванне было прыпынена 22 мая 2026 года.
“Акруговая пракуратура ў Варшаве падкрэслівае, што да правядзення працэсуальных дзеянняў і ўстанаўлення абставін па гэтым расследаванні прыцягнуты ўсе дзяржаўныя службы і ведамствы, якія разглядаюць устанаўленне асобы злачынцы, яго выяўленне і прыцягненне да адказнасці перад польскім правасуддзем як справу гонару”, — гаворыцца ў паведамленні.
