Першы крыптабанк у Беларусі можа з’явіцца праз паўгода. Такі тэрмін спатрэбіцца для прывядзення заканадаўства ў адпаведнасць з указам аб крыптабанку, падпісаным сёння. Пра гэта паведаміў першы намеснік старшыні праўлення Нацбанка Аляксандр Ягораў.
«Мы ўзялі тэрмін шэсць месяцаў для прывядзення заканадаўства ў адпаведнасць з дадзеным указам. І паралельна, безумоўна, мы будзем працаваць з усімі патэнцыйнымі інвестарамі, як унутранымі інвестарамі, так і замежнымі інвестарамі, для таго, каб практычна адразу пасля падрыхтоўкі ўсяго заканадаўства мы маглі ўжо ўбачыць у нас у краіне першыя крыптабанкі. Цікавасць да гэтага праяўляюць розныя краіны. Насамрэч усе ідэі, якія звязаныя са з’яўленнем крыптабанкаў, таксама ўзніклі не на пустым месцы. Гэта, скажам так, першапачаткова інтарэс інвестараў. І ўжо потым развіццё гэтай ідэі ў праект нарматыўнага акта, які падтрыманы кіраўніком дзяржавы», — сказаў ён.
Як вынікае з указа, крыптабанк будзе аб’ядноўваць функцыі звычайнага банка і крыптабіржы. Яго дзейнасць будзе кантралявацца Нацбанкам, пры гэтым крыптабанк таксама будзе атрымліваць ліцэнзію ад ПВТ, які адказвае за кантроль у сферы крыптавалют.
Аляксандр Ягораў таксама распавёў, што крыптабанк зможа выдаваць крэдыты пад заклад крыптавалюты, ён створыць магчымасць для самазанятых атрымліваць зарплату ў крыптавалютах, фізічныя асобы змогуць атрымліваць у ім банкаўскія карткі, прывязаныя да рахункаў у крыптавалюце.