Аляксандр Лукашэнка на сённяшнім пасяджэнні Савета бяспекі запатрабаваў ад Літвы сесці за стол перамоваў, падкрэсліўшы, што грузавікі літоўскіх перавозчыкаў проста так не пакінуць тэрыторыю Беларусі. Паводле яго слоў, Мінск нават гатовы выкупіць хуткапсавальныя грузы.
Таксама Лукашэнка назваў некаторыя патрабаванні да Літвы ў рамках меркаваных перамоваў.
“Вярніце нам 17 або 20 аўтамабіляў, якія вы скралі. Пажарныя аўтамабілі, якія пастаўлялі ў Зімбабвэ. Нармалізуйце працу нашага санаторыя, дзе мы лячылі чарнобыльскіх дзяцей. Яны ў дзяцей адабралі фактычна санаторый. І вярніце нам грошы за тое, што мы там будавалі порт”, — сказаў ён.
Нагадаем, “Беларуськалій” валодаў 30% у кампаніі, якая аперуе тэрміналам насыпных грузаў у порце Клайпеды. Праз яго ажыццяўлялася перавалка беларускіх калійных угнаенняў.
Трэба адзначыць, што сёння Лукашэнка таксама ўзгадаў “альтэрнатыўныя ўрады”, якія нібыта ствараюць суседнія краіны.
«Яны ад нас чагосьці патрабуюць. А калі б мы ў Беларусі стваралі альтэрнатыўныя ўрады і падтрымлівалі «змагароў за незалежнасць». Яны там ствараюць баявыя атрады, яны іх узбройваюць. Памятаеце — харугвы. Яны нікуды не дзеліся. І цэлыя палкі, як яны называюць. Гэта што, жарт? І яны яшчэ нам нейкія прэтэнзіі прад’яўляюць. Ну, утрымліваюць яны іх — няхай утрымліваюць. Калі ў іх ёсць грошы. Але калі гэта накіравана супраць нашай краіны, мы як на гэта павінны рэагаваць?» — сказаў ён.
